Xiaomi kompaniyasi 5 000 mA/soat sig‘imga ega bo‘lgan Magnetic Ultra Slim nomli yangi tashqi akkumulyatorni taqdim etdi. Uning qalinligi atigi 8,7 millimetrni tashkil etadi. Qurilma MagSafe’ga mos iPhone hamda boshqa gadjetlarga ulanadigan 17 ta magnit bilan jihozlangan.
Korpus alyuminiy qotishmasidan tayyorlangan, magnitli tomoni esa mustahkam shisha tolali paneldan iborat. Zaryad olish sig‘imini yo‘qotmay, akkumulyator o‘lchamni kichraytirish maqsadida ishlab chiqaruvchilar yuqori zichlikdagi litiy-kobalt-oksidli batareyadan foydalangan. Qurilma hatto 300 marta quvvatlash siklidan so‘ng ham dastlabki sig‘imining 80 foizdan ortig‘ini saqlab qoladi.
USB‑C porti orqali 22,5 Vt gacha simli quvvat yetkazib beriladi, magnitli simsiz quvvatlash esa 5 dan 15 Vt gacha yetadi. Poverbank bir vaqtning o‘zida ikki qurilmani zaryadlashga qodir.
Termodatchik tizimi har daqiqada 12 000 marta haroratni nazorat qiladi, 826 mm² maydonga ega issiqlik o‘tkazuvchi qatlam esa ortiqcha haroratni chiqarib yuboradi. Ishlab chiqaruvchining ta’kidlashicha, akkumulyator ortiqcha zaryad olish, qizib ketish, qisqa tutashuvdan himoyalangan.
Poverbank Xitoyda 169 yuanga (taxminan 25 dollar) narxda sotuvga chiqqan. Hozirda to‘rtta rang: ko‘k, qora, binafsha va oltin ranglisi sotuvda.
Izoh (0)