Raqamli detoksga qaror qildingiz, ammo telefonsiz nima qilishni bilmayapsiz. Bu tushunarli, chunki bugun gadjetlar yordamida deyarli hamma narsani bajaramiz. Kitob o‘qiymiz, ta’limiy videolar va mahorat darslarini ko‘ramiz, hatto maxsus ilovalar orqali meditatsiya qilamiz. Ammo gadjetlarsiz ham qiziqarli mashg‘ulotlarni bajarish mumkin.
Rasm chizish
Bolalikda rasm chizgan bo‘lsangiz, bu ko‘nikmani qaytarish vaqti keldi. Eskiz albomi, qalam yoki bo‘yoqlarni oling va xohlagan narsangizni chizing. Rasmni yaxshi chizolmasangiz ham muammo emas. Birinchidan, yangi hobbi boshlash uchun hech qachon kech emas. Ikkinchidan, yangi boshlovchilarga mos keladigan oson va tinchlantiradigan rasm uslublari mavjud. Masalan, turli naqshlar, mandalalar chizish mumkin.
Jurnal varaqlash
Bolalikda ko‘pchilik uyida turli mavzudagi — moda, sayohat, pazandachilik, fan haqidagi — jurnallar to‘plami bo‘lardi. Ularni varaqlash, rasmlarni tomosha qilish qiziqarli. Sarlavhalar va ajratib ko‘rsatilgan iqtiboslarni o‘qish, qiziq maqolalarni chuqurroq o‘rganish maroqli edi. Kutubxonaga boring — u yerda butun boshli jurnallar to‘plamini bepul (yoki abonementga) olishingiz mumkin.
Chiroyli kundalik tutish
Tan oling, siz ham boshqalarning kundaligidagi chiroyli rasmlarni Pinterest’da tomosha qilishni yoqtirasiz-a? U yerda qiziqarli mashg‘ulotlar, kitoblar va filmlar ro‘yxati, ta’til rejalari va mukammal ertalabki tartibni topish mumkin. Telefonsiz kun — nihoyat kundalik tutish va uni chiroyli bezatish uchun ajoyib imkoniyat. Markerlar, rangli ruchkalar va stikerlardan foydalaning.
Mazali taom tayyorlash
Ovqat tayyorlash ham yoqimli va foydali mashg‘ulot. Masalan, italyancha pastani noldan tayyorlab ko‘ring. Bu taom minimal masalliqlarni talab qiladi va jarayon sizga zavq bag‘ishlaydi. Avval xamir qorib, yoying, keyin sous tayyorlang. Pomidor va rayhon bilan klassik italyancha sous qilish mumkin. Shoshilmang, sabzavot va ziravorlar hididan bahramand bo‘ling. So‘ngra tayyor taomni tatib ko‘ring.
Pazl yig‘ish
Bu mashg‘ulot ham juda qiziqarli. Albatta, bunda ko‘nikmalaringiz va bo‘sh vaqtingizni hisobga olish muhim. Agar bir kechada pazl yig‘moqchi bo‘lsangiz, kontrast rasmli 500 tagacha bo‘lakli to‘plamni tanlang. Agar uzoq muddatli loyihaga kirishishga tayyor bo‘lsangiz, o‘zingizni hech narsa bilan cheklamang.
Xona o‘simliklarini parvarishlash
O‘simliklarni parvarish qilish meditativ va tinchlantiruvchi mashg‘ulot. Yashil do‘stlaringiz ahvolini tekshiring. Barglarni latta bilan changdan tozalang yoki o‘simliklarni suv ostida yuving. Qurib qolgan novdalarni kesib tashlang. Tuvagi torlik qilayotgan o‘simliklarni qayta eking.
Oddiy musiqa asbobini chalishni o‘rganish
Hatto musiqa maktabida o‘qimagan va notalarni bilmaydiganlar ham musiqa chala oladi. Yoqimli, meditativ tovushlar chiqaradigan ko‘plab oddiy musiqa asboblari mavjud. Masalan, bongo barabani, glyukofon, kalimba yoki hatto bolalar metallofonini sinab ko‘rish mumkin.
Qo‘l mehnati
Bunda variantlar mavjud — ip yoki munchoqdan bilaguzuklar yasash, paypoq yoki yumshoq o‘yinchoqlar to‘qish, eski futbolkani mato bo‘yoqlari bilan bezatish yoki jinsga gullar tikish mumkin.
Uyda mashg‘ulot o‘tkazish
Sevimli musiqaga raqsga tushish, bir necha mashqlarni bajarish yoki yoga bilan shug‘ullanish — bu o‘zingizga bog‘liq. Agar sport bilan muntazam shug‘ullanmasangiz, o‘zingizni ortiqcha qiynamang. Og‘riq bo‘lganda mashqlarni to‘xtating va yurak urishingiz haddan tashqari tezlashmaganiga e’tibor qarating.
Kiyim javonini tartibga keltirish
Telefonsiz kun uchun aynan mos keladigan foydali va yoqimli ish. Shkafingizni tartibga soling. Uzoq vaqtdan beri kiyilmagan narsalarni ajratib oling va ularga joy toping. Yaxshi holatdagi kiyimlarni sotish yoki xayriya tashkilotiga topshirish mumkin. Juda eski narsalarni qayta ishlashga topshiring. Qolganlarini tartibga keltiring. Yuvib, kichik nuqsonlarni tuzating — tugmalarini tiking, yirtiqlarni yamang.
Dush qabul qilish
Ha, dush qabul qilish ham xobbi bo‘lishi mumkin. Bu trendning hatto nomi ham bor — Everything Shower. Bu shunchaki cho‘milish emas, balki uyingizda haqiqiy spa muolajasini o‘tkazishdir. Shamlarni yoqing, yoqimli musiqa qo‘ying va xushbo‘y skrab va niqoblaringizdan foydalaning.
Izoh (0)