Apple kompaniyasi WWDC 2025 ko‘rgazmasida eʼlon qilishi mumkin bo‘lgan AirPods uchun katta yangilanishni tayyorlayotganga o‘xshaydi. Xabarlarga ko‘ra, kompaniya quloqchinlar yordamida iPhone yoki iPadʼning kamerasini boshqarish imkonini beruvchi funksiya ustida ishlamoqda. Foydalanuvchi AirPods oyoqchasiga teginish orqali suratga olishi mumkin.
Yana bir yangilik – quloqchin egasi uyquga ketganda avtomatik ravishda musiqa yoki podkastni to‘xtata olish imkoniyatidir. Buning uchun allaqachon uyquni kuzatishni biladigan Apple Watch kerak bo‘ladimi yoki yo‘qmi, hozircha nomaʼlum.
Apple, shuningdek, suhbatni aniqlash funksiyasining imkoniyatlarini kengaytiradigan yangi bosh imo-ishorasini ham joriy qilishi mumkin. Suhbat paytida ovoz balandligini avtomatik pasaytiradigan tizim qo‘shimcha tovush sozlamalarini olishi mumkin.
Bundan tashqari, AirPods “studiya sifatli” mikrofon rejimiga ega bo‘lishi mumkin, u iPhone 16 ning videolardagi fon shovqinini tozalaydigan funksiyasi kabi ishlashi kutilmoqda.
Yana bir yaxshilanish taʼlim muassasalariga tegishli: Apple AirPodsʼni talabalar foydalanadigan jamoat iPadʼlariga ulashni soddalashtirmoqchi.
Bu kabi barcha tafsilotlar 9-iyun kuni WWDC 2025 taqdimotida oshkor etilishi kutilmoqda.
Izoh (0)