iPhone 16 ning bazaviy modeli 2025-yilning yanvar–mart oylarida smartfonlar savdosi bo‘yicha dunyo reytingida birinchi o‘ringa qaytdi. Bu hodisa so‘nggi ikki yil ichida ilk marotaba yuz berdi. Bu haqda Counterpoint Research tadqiqot kompaniyasi xabar berdi. Apple ketma-ket beshinchi marta yilning birinchi choragida yetakchi o‘ntalikda beshta o‘rinni egallashga muvaffaq bo‘ldi.
Ikkinchi va uchinchi o‘rinlarni mos ravishda iPhone 16 Pro Max va iPhone 16 Pro egalladi. Xitoy bozorida arzonroq modellarga katta miqdorda subsidiya berilishi va unga bo‘lgan talab yuqori bo‘lishiga qaramay, flagman versiyalar ketma-ket uch chorak davomida iPhone savdosining deyarli yarmini tashkil qilmoqda.
Fevral oyida sotuvga chiqqan iPhone 16e modeli esa mart oyidagi global reytingda oltinchi o‘rinni egalladi. U 2022-yilgi iPhone SE’dan qimmatroq bo‘lsa-da, takomillashtirilgan texnik xususiyatlari va kengaytirilgan funksionalligi tufayli savdoda katta muvaffaqiyatga erishdi. Yil yakuniga kelib iPhone 16eʼning avvalgi modellardan o‘zib ketishi kutilmoqda.
Samsung ham mazkur reytingda barqaror o‘rnini saqlab turibdi: Galaxy A16 5G modeli Shimoliy Amerika va rivojlanayotgan mintaqalarda savdo hajmining kengayishi hisobiga beshinchi o‘ringa ko‘tarildi. Galaxy S25 Ultra esa o‘tgan yildagi S24 Ultra bilan solishtirganda beshinchidan yettinchi o‘ringa tushib ketdi. Bunga asosan smartfonning sotuvga kechroq chiqgani va birinchi chorakda qisqaroq vaqt davomida savdoda bo‘lgani sabab bo‘ldi.
Arzon smartfonlarga qiziqish ham jadal o‘smoqda: narxi 100 dollardan past bo‘lgan modellarning bozor ulushi 20 foizga yetib, eng tez o‘sayotgan smartfonlar toifasiga aylandi. Ayniqsa, Galaxy A06 va Redmi 14C 4G modellari ajralib turdi: Redmi 14C 4G Apple yoki Samsung’ga tegishli bo‘lmagan yagona model bo‘lib, Redmi 13C 4G bilan solishtirganda 43 foizlik o‘sishni qayd etdi.
Analitiklar fikricha, iqtisodiy beqarorlik va global savdo tizimidagi o‘zgarishlarga qaramay, eng mashhur smartfonlarning o‘rni o‘zgarmay qoladi.
Izoh (0)