San Fransiskodagi Kaliforniya universiteti olimlari ijtimoiy tarmoqlar bolalar va o‘smirlarda depressiya alomatlarini kuchaytirishini tasdiqladi. JAMA Network Openʼda chop etilgan tadqiqot, shuni ko‘rsatdiki, bolalar ijtimoiy tarmoqlarda qancha ko‘p vaqt o‘tkazsa, ularda depressiya belgilari shunchalik kuchli namoyon bo‘ladi. Shu bilan birga, teskari bog‘liqlik topilmadi: depressiyaga chalingan o‘smirlar internetda ko‘proq vaqt o‘tkazishga moyil emas.
Tajribada 9 yoshdan 13 yoshgacha bo‘lgan 12 mingga yaqin bola ishtirok etdi. Uch yil ichida ularning ijtimoiy tarmoqlardan kunlik foydalanishi 7 daqiqadan 73 daqiqagacha oshdi, depressiya alomatlari esa 35 foizga kuchaydi.
Bu ijtimoiy tarmoqlar nafaqat tushkun holatni aks ettirishi, balki uning rivojlanishiga hissa qo‘shishini aniq ko‘rsatadigan birinchi tadqiqotlardan biridir, deb tushuntirdi ishning yetakchi muallifi Jeyson Nagata.
Olimlar depressiya xavfini oshiradigan bir nechta omillarni taʼkidlamoqdalar. Birinchidan, bu kiberbulling — internetdagi taʼqib o‘z joniga qasd qilish va psixoaktiv moddalarni isteʼmol qilish xavfini oshiradi. Bundan tashqari, ijtimoiy tarmoqlar gadjetlarga qaramlikni keltirib chiqaradi, bu esa uyquning buzilishiga olib keladi. Shuningdek, ko‘p vaqtini smartfonlarda o‘tkazadigan o‘smirlar o‘zlarini boshqa, ideallashtirilgan obrazlar bilan solishtiradilar, buning natijasida depressiya alomatlari yanada kuchayadi.
Izoh (0)