Raqobatni rivojlantirish va iste’molchilar huquqlarini himoya qilish qo‘mitasi xorijda ishlash va o‘qish uchun “oson” borishni va’da qilayotgan konsalting firmalardan ogoh bo‘lishga chaqirdi.
Ma’lum qilinishicha, 2025-yilda fuqarolardan aldamchi konsalting firmalari bo‘yicha 20 ga yaqin murojaat kelib tushgan bo‘lib, ularning ko‘pchiligi xorijda ishga yoki o‘qishga joylashtirish va’dasi bilan firmalarga pul to‘lagan, ammo to‘langan mablag‘lar qaytarilmagan yoki xizmatlar bajarilmaganini bildirmoqda.
Xususan:
- Toshkent shahridagi “Konsalting N1 B2B” MCHJga 16 million so‘mdan ortiq to‘lov qilgan A.B.ning Latviyaga ishga yuborish masalasi bo‘yicha;
- Farg‘ona shahrida yashovchi fuqaro Sh.M.ning Latviyada ish topish va viza rasmiylashtirib berish uchun Qo‘qondagi Vivat Viz MCHJga jami 2000 dollar ekvivalenti miqdorida pul to‘lagani to‘g‘risida;
- Toshkent viloyati Yangiyo‘l tumanidagi fuqaro O.X. Germaniyaga ishlashga borish maqsadida Yakkasaroy tumanidagi Black Mountain Pro MCHJga 36 million so‘m to‘lagan. Biroq, firma faoliyatini yuritmayotgani, xizmatlar bajarilmagani hamda pullar qaytarilmagani to‘g‘risida va boshqa murojaatlar kelib tushgan.
“Xususiy bandlik agentliklari to‘g‘risida”gi qonunga muvofiq, xorijda ishga joylashtirish xizmati faqat litsenziyaga ega agentliklar tomonidan amalga oshirilishi mumkin. Ammo ko‘pgina firmalar bu qoidaga amal qilmaydi. Jumladan, “Diamond Ideal”, “Xorijda ish va o‘qish”, SJ Team, Consulting FLY, Asia Consult Edugately, Euro Asia consulting centre, Exlusive assistant, DOCH Consult, Global consulting effort va Poland business support and viza MCHJlar kabi konsalting firmalari ijtimoiy tarmoqlar orqali fuqarolarni ishonchiga kirib, ularga xorijga ishga yoki o‘qishga yuborishni va’da qilib, pul olgan, ammo ularning xizmatlari bajarilmagan.
Qayd etilishicha, bunday firmalarning ko‘pchiligi litsenziyaga ega emas va ularning faoliyati qonuniy emas.
Shuningdek, Yevropaning Irlandiya, Angliya, Daniya, Norvegiya kabi davlatlariga ishga yuborish to‘g‘risida e’lonlar berib, fuqarolarga konsalting xizmatlari emas, aynan xorijga ishga joylashtirish bo‘yicha xizmatlarni ko‘rsatish bilan shug‘ullanib kelayotgan Everyone consult va Worldviza MCHJlarga Migratsiya agentligi tomonidan BHMning 300 baravari (112,5 million so‘m) miqdorida jarima qo‘llanilgan. Rich Result, Ravon Consult Group va Adworld Group MCHJ kabi firmalarga nisbatan ham huquqiy choralar ko‘rilgan.
“Xorijda o‘qish va ishlash niyatida bo‘lsangiz, har qanday o‘rtakash firmalar aldovlariga ishonmang, ular faoliyati qonuniyligini va litsenziyasi mavjudligini tekshiring” deyiladi qo‘mita xabarida.
Ularning litsenziyalari bor-yo‘qligini Adliya vazirligi saytidagi reyestrdan tekshirish mumkin.
Qo‘mita yuqoridagi kabi vaziyatlarga tushib qolmaslik uchun shartnoma shartlari bilan batafsil tanishib chiqishga, uning xizmatiga pul to‘lashdan avval aldov va firibgarlik qurboni bo‘lib qolmaslikka to‘liq ishonch hosil qilishga chaqirdi.
Izoh (0)