O‘zbekistonda qator davlat va jamoat tashkilotlari, media sohasi ekspertlari ishtirokida sohani tartibga soluvchi to‘g‘ridan to‘g‘ri amal qiladigan yaxlit qonun loyihasi ishlab chiqildi. Bu haqda 7-may kuni Oliy Majlis Qonunchilik palatasining Innovatsion rivojlanish va axborot texnologiyalari masalalari qo‘mitasida onlayn-platformalar foydalanuvchilari huquqlari, sohada yuzaga kelayotgan ijtimoiy munosabatlar, zamonaviy chaqiriqlar muhokamasiga bag‘ishlangan davra suhbatida ma’lum qilindi.
Davra suhbatida O‘zbekistonda hozir ochiqlik siyosati davrida internet va ijtimoiy tarmoqlar fuqarolarning axborotga bo‘lgan ehtiyojini tezkor qondirish, jamiyatdagi dolzarb muammolarni muhokama qilishda muhim vositaga aylanib borayotgani ta’kidlandi. Ushbu sharoitda onlayn platformalar foydalanuvchilarining huquq va qonuniy manfaatlarini qonun asosida aniq mustahkamlab qo‘yishning ahamiyati borasida mutaxassislarning fikr-mulohazalari tinglandi.
Shu munosabat bilan, tadbirda ishtirok etgan Axborot va ommaviy kommunikatsiyalar agentligi vakillari tomonidan qator davlat va jamoat tashkilotlari, media sohasi ekspertlari ishtirokida sohani tartibga soluvchi to‘g‘ridan to‘g‘ri amal qiladigan yaxlit qonun loyihasi ishlab chiqilgani ma’lum qilindi.
Unda onlayn platformalar sohasidagi amaldagi qonunchilik sezilarli liberallashtirilib, tartibga solishdagi mavjud bo‘shliqlarni bartaraf etishga qaratilgan qator normalar nazarda tutilgan bo‘lib, ularning qabul qilinishi eng avvalo:
- onlayn platformalar foydalanuvchilari huquqlarini qonun darajasida mustahkamlash;
- internet tarmog‘ida axborot tarqatish tartiblari borasida huquqiy aniqlik va izchillikni ta’minlash;
- onlayn platformalar va veb-sayt egalari uchun O‘zbekistonda faoliyat yuritishning aniq shartlarini belgilash, ularning biznes modellari uchun shart-sharoitlarni aniq prognozlash imkoniyatini yaratish;
- axborot sohasi ishtirokchilari, jumladan, onlayn platformalar, blogerlar, inflyuenserlar hamda sohani tartibga soluvchi davlat organlari o‘rtasida o‘zaro muloqot va konstruktiv hamkorlik uchun huquqiy asoslarni takomillashtirish;
- internetdan foydalanish xavfsizligi darajasini oshirish, bolalar sog‘lig‘iga xavf soluvchi axborotlardan himoya qilish bo‘yicha aniq mexanizmlarni yaratish;
- foydalanuvchilar o‘z sha’n va qadr-qimmatini kamsituvchi ma’lumotlardan himoyalanish borasida huquqiy kafolatlarga va zarur hollarda vakolatli organning ko‘magidan foydalanish imkoniyatini yaratadi.
Ma’lum qilinishicha, qonun loyihasida inflyuenser va blogerlar mas’uliyati ajratilib, blogerlar majburiyatlari sezilarli yengillashtirilmoqda.
Davra suhbatida loyiha bilan kiritilayotgan yangi huquqiy institutlar batafsil ko‘rib chiqildi va uni jamoatchilik muhokamasiga qo‘yish to‘g‘risida xulosaga kelindi.
O‘zbekistonda blogerlar faoliyati qanday tartibga solinadi?
Ayni paytda O‘zbekistonda blogerlar faoliyati to‘g‘ridan to‘g‘ri alohida qonun bilan emas, balki mavjud axborot va internet sohasidagi umumiy qonunchilik asosida tartibga solinadi. Jumladan, OAV faoliyatini tartibga soluvchi “Ommaviy axborot vositalari to‘g‘risida”gi qonun mavjud. Blogerlar rasmiy ravishda OAV deb hisoblanmaydi, ammo ular ommaga axborot tarqatgani sababli ayrim hollarda OAVlarga qo‘yilgan mas’uliyatlar blogerlarga ham taalluqli bo‘lishi mumkin.
“Axborotlashtirish to‘g‘risida”gi qonunga binoan, internetda axborot tarqatayotgan har qanday shaxs, shu jumladan, blogerlar ham qonunga zid bo‘lmagan kontentni tarqatishi, shaxsiy hayot daxlsizligiga rioya qilishi, yolg‘on yoki tasdiqlanmagan ma’lumotlarni tarqatmasligi lozim. Adliya vazirligi, AOKA tomonidan e’lon qilinadigan tartib va ko‘rsatmalarda blogerlar ham eslatib o‘tiladi.
Agar blogerlar muntazam daromad topsa (reklama, homiylik va h.k.), ular soliq to‘lash majburiyatiga ham ega bo‘ladi.
Izoh (0)