Bugundan, yaʼni 20-iyundan boshlab davlat fuqarolik xizmatchisiga o‘rtacha oylik ish haqining 30 foizidan ko‘p bo‘lmagan miqdorda jarima qo‘llaniladi. Bu haqda mehnat huquqi bo‘yicha mutaxassis Saidali Muxtoraliyev “Daryo”ga maʼlum qildi.
Saidali Muxtoraliyevning tushuntirishicha, shu kunga qadar davlat fuqarolik xizmatchilariga ham hamma xodimlar qatori Mehnat kodeksining 312-moddasiga ko‘ra intizomiy jazo chorasi qo‘llanilgan. Yaʼni:
O‘rtacha oylik ish haqining 30 foizidan ko‘p bo‘lmagan miqdorda jarima. Ichki mehnat tartibi qoidalarida xodimga o‘rtacha oylik ish haqining ellik foizidan ko‘p bo‘lmagan miqdorda jarima solinishi hollari nazarda tutilishi mumkin.
Prezident farmoni bilan milliy darajadagi davlat organlari davlat fuqarolik xizmati lavozimlarining davlat reyestri tasdiqlandi.
Ko‘p kutilgan reyestr tasdiqlandi. Endilikda davlat fuqarolik xizmatchisiga “Davlat fuqarolik xizmati to‘g‘risida”gi qonuning 46-moddasida nazarda tutilgan intizomiy jazo choralari qo‘llaniladi. Chunki qonun 3 yil avval kuchga kirgan bo‘lsa-da, reyestr tasdiqlanmaguncha ushbu moddani qo‘llab bo‘lmagan, dedi Saidali Muxtoraliyev.
Davlat fuqarolik xizmatchisiga nisbatan quyidagi intizomiy jazo choralari:
- hayfsan;
- o‘rtacha oylik ish haqining o‘ttiz foizidan ko‘p bo‘lmagan miqdorda jarima;
- malaka darajasini pasaytirish;
- davlat fuqarolik xizmati lavozimini pasaytirish;
- egallab turgan davlat fuqarolik xizmati lavozimidan ozod qilish.
- Davlat fuqarolik xizmatchisiga nisbatan ushbu moddaning ikkinchi qismida nazarda tutilmagan boshqa intizomiy jazo choralarini qo‘llash taqiqlanadi.
Saidali Muxtoraliyevning alohida taʼkidlashicha, “malaka darajasini pasaytirish” va “davlat fuqarolik xizmati lavozimini pasaytirish” yangi jazo choralari bo‘lib, bu xizmatchilarga katta masʼuliyat yuklaydi.
Izoh (0)