Imronning “Yomon qiz” klipidagi roli bilan tanilgan, ko‘plab film va seriallarda suratga tushgan, yuzdan ortiq klipda bosh rolni ijro etgan aktrisa, havaskor xonanda Durdona Qurbonova bu yil 27 yoshni qarshiladi. Shu munosabat bilan aktrisaning faoliyatiga nazar solamiz.
“Instagramʼimni onam nazorat qiladi”
— Intervyularimga dadam uncha ahamiyat bermaydi. Faqat qayerdadir ko‘rib qolsa, mana bu yerda bunday debsan, unday dema, deb qo‘yadi. Onam esa kuzatadi. Hatto Instagram sahifamda izoh yozadi. Negativ fikr yozganlarni ko‘rsa, jahli chiqadi. Baʼzan qo‘ygan rasmlarim yoqmaganda o‘chirtirgan paytlari ham bo‘lgan, deydi Durdona.
“Feruza Normatova bilan munosabatimiz haqida undan so‘ranglar”
Durdona Qurbonova va Feruza Normatova “Million” jamoasidagi ishtirokidan so‘ng, bir-biri bilan arazlashib qolgan. Durdona Qurbonova hamkasbi bilan o‘rtasidagi kelishmovchilikni quyidagicha izohlagan.
— Nega munosabatimiz yaxshi emasligini u aktrisadan so‘rash kerak. O‘sha paytda o‘rtamizda har xil gap-so‘zlar bo‘lgan, hozir hammasiga to‘g‘ri qarayman. Atrofdagi insonlar hadeb itaraverishsa, unga talpinavermaysiz-ku. Bundan tashqari, salomga yarasha alik olinadi. U aktrisa ham muomalasiga yarasha javob olgan. Lekin hozirgi kunda ularga nisbatan dushmanchiligim ham, ortiqcha gapim ham yo‘q, degan aktrisa Durdona Qurbonova.
“Oxirigacha ‘Bravoʼda qolaman”
Durdona Qurbonova hozirda talabgir aktrisalardan biri, u kino va kliplardagi faoliyatidan tashqari “Bravo” kulgi jamoasining a’zosi. U boshqa jamoalardan taklif bo‘lsa, qanday yo‘l tutishini aytdi.
— Oxirigacha “Bravo” jamoasi bilan qolaman, albatta. Rostini aytsam, qiziqchilar guruhida boshqa chiqmayman deb, o‘zimga o‘zim so‘z bergandim. Jonli sahnani juda yaxshi ko‘raman, orada 2-3 yil qatnashmaganimda rosa sog‘indim. Mayli, gapirgan gapimdan qaytsam ham, sahnaga chiqqim keldi va “Bravo” bilan ijodni davom ettiryapman. Sahnada turganimda to‘rt mingta insonning eshitiladigan kulgisi va emotsiyasini hech nimaga alishib bo‘lmaydi, deydi aktrisa.
200 dollar mashmashasi
Bundan bir necha yil avval Manzura ma’muri orqali Durdona Qurbonovaga klipiga suratga tushish taklifi bilan chiqqan. Ammo Durdona gonorar ozligi va qo‘pol muomala sababli taklifni rad etgan. Bu voqea keyinroq ikki san’atkor o‘rtasida biroz nizoli va tushunarsiz vaziyatni keltirib chiqargan.
— Menga Manzuraning adminstratori qo‘ng‘iroq qilib, klip borligini, vaqtim qandayligini so‘radi. Men taqvimga qarab vaqtim borligini aytdim. Narx so‘radi, aytdim. Birozdan keyin qayta qo‘ng‘iroq qilib, men tushadigan bo‘lganimni, lekin narx biroz men so‘ragan summa bo‘lmasligini aytishdi. Men esa ular aytgan narxga tusha olmasligimni aytsam, nima qilibdi, klip Manzuraniki-ku, dedi. Men Manzura bo‘lsa tekinga tushib berishim kerakmi, dedim. Menga ko‘p rejissyorlar qo‘ng‘iroq qilib, suratga tushish kerak bo‘lsa, muomalani juda chiroyli ushlashadiki, uyalganimdan ham ular aytgan summaga rozi bo‘laman. Aslida, men Manzuraning klipiga chiqib, tanilib ham ketmayman. Men so‘ragan summani boshqaga berib rol o‘ynatganlarni ham bilaman.
“Aldama meni” ko‘rsatuvi boshlovchisi Maʼrufxo‘jaga ham yuqoridagi gaplarimni kesmasdan efirga berishini aytdim. U ham kesmasligini aytdi. Instagram’da ham menga yozishdi. “Bu yerda Durdonani yomon ko‘rsatib qo‘yishgan, biz o‘sha syomkada tomoshabin bo‘lganmiz. Manzura opani qanday hurmat qilishingizni ko‘rdik. U buni tushunmasdan intervyu berib qo‘ygan”, deganlar ham bor. U intervyularida meni eplolmaydi, degan mazmunda gapiribdi. Balki shunday bo‘lishi ham mumkindir, lekin men sanʼatga boshqa sohadan kelib qolgan havaskor aktrisa emasman. Kollejda ham, institutda ham shu yo‘nalishda o‘qiydigan professionalman, degan Durdona Qurbonova.
“Vaqtida tekinga ham ishlaganman”
— Manzura opa intervyu berganida 200 dollar davlat oyligi, bu summa uchun odamlar oylab ishlaydi, degan. Men avvalo pul uchun klipni rad etmadim, menga qilingan muomala yoqmadi. Odamlar aktrisani keladi, rol o‘ynaydi, ketadi, deb o‘ylaydi. Unday emas, mening vaqtim, pulim ketadi, xarajat qilaman. Men ham o‘zim uchun nimadir qilishni istayman. O‘z mehnatim bilan mashina oldim. Vaqti kelsa, ertalab oltidan kechki bir-ikkigacha ham syomkada qolib ketamiz. Hattoki tonggi besh-oltigacha ham ishlashga to‘g‘ri keladi. Masalan, “Yomon qiz” klipiga kechki 22:00 dan tonggi 05:00 gacha ishladim. Keyin ikki soat uxlab, yana syomkaga ketganman. Ularning qilgan muomalasi menga yoqmadi. “Zvezda” bo‘lsa tekinga ishlashim kerakmi? Lekin men vaqtida tekinga ham chiqqanman. Avvalo, muomalani chiroyli qilish kerak, degan aktrisa.
Durdona nega to‘ylarga chiqmaydi?
— Hozirgi kunda aktyor va aktrisalarga beriladigan gonorar o‘zi kam. Chet el bilan solishtirganda. Lekin men boshidayoq to‘yga chiqishni istamadim. Boshqa nimadir xususiy biznes ochishim mumkin, lekin to‘yga chiqmayman. Uydagilarim ham yoqtirishmaydi. Hammasi mablag‘ga borib taqaladi. Bugun serial va kinolar uchun gonorar kam. Aktrisalik ham bir kasb. U hayotimizda asosiy o‘rin tutadi, deydi Durdona.
“Qachon san’atdan chiqib ketishimni aytdim”
— Hijobda tushgan rasmimni Instagram sahifamga joylaganimda ko‘pchilik yarashibdi sizga, qachon hijobga kirasiz, dedi. Aniq-tiniq qilib qachonki haqiqiy muslima qiz bo‘lganimda san’atdan chiqib ketaman, dedim. Chunki hijobga kirgandan so‘ng ham san’at sohasida bachkana rollar o‘ynab yurishni xohlamayman. Keyin o‘zimni bizneslarimni qilaman. San’atdagi cho‘qqi menga nima ham berardi. Odam katta bo‘lgani sayin, ilmi oshgani sayin o‘ziga “Senga bu san’at nima beradi, nimaga kerak, san’atdan oxirating uchun qanday foyda”, degan savollarni berarkan. Faqatgina odamlarning oldida shon-shuhrat beradi, xolos.
San’at xiyonatkor bo‘ladi. Hozir muxlislarim ko‘p. Qaysidir ma’noda eng reytingi baland aktrisalardan biriman. Qachondir mening ham davrim o‘tadi va mening muxlislarim boshqa aktrisaga muxlislik qilishadi. Bu degani — san’at sizga bevafo, xiyonatchi. Men bevafo, xiyonatchi san’at uchun umrimni, hayotimni berib nima qilaman? San’atda erishadiganimga erishdim. Bundan cho‘qqisi, menimcha, yo‘q. Eng yuqori cho‘qqidaman. Bundan buyog‘iga san’atda emas, boshqa yo‘nalishlarda ham rivojlanib, cho‘qqiga chiqishni niyat qilyapman, deydi Durdona.
“O‘zini hurmat qilgan inson bunga rozi bo‘lmaydi”
Durdona uning xarakterini bilmaydigan insonlar tomonidan bo‘lgan nojo‘ya takliflar haqida so‘zlab berdi.
— Nojo‘ya takliflar bo‘lgan. Bu asosan san’atga endi kirib kelayotgan vaqtimda ko‘p bo‘lgan. Shou-biznesga endi kirib kelayotganimda xarakterimni bilmaydiganlar har xil nojo‘ya takliflar qilgan. Ko‘pchilik qizlar shou-biznesga endi kirib kelayotgan vaqtlarida “mashhur bo‘laman”, deb kirib keladi. U mashhur bo‘lishi uchun kimlardir no‘jo‘ya takliflarni qiladi, qaysidir aktrisa balki bu taklifga rozi bo‘lar, ammo o‘zini hurmat qilgan inson bunaqa takliflarga rozi bo‘lmaydi. San’at mening hayotim bo‘lmagani uchun hammasiga to‘g‘ri yo‘lni ko‘rsatganman, urishgan vaqtlarim ham bo‘lgan. Bunday takliflarni rejissyorlar, aktyorlar berishgan.
Nojo‘ya taklif faqatgina nojo‘ya, ko‘pchilik o‘ylaganidek yomon ma’noda emas, “yaxshi ko‘rib qoldim” mazmunidagi so‘zlardan ham iborat bo‘lgan. O‘zimning darajamni ushlab, yo‘limni topganimdan so‘ng, menga hech kim ortiqcha gap gapira olmaydigan bo‘lgan. Hattoki bolalar kelib, gapirishga ham qo‘rqadi, deydi aktrisa.
“Hamma narsamni o‘z pulimga sotib olganman”
Durdona Qurbonova kino olamidagi pulsizlik muammosi, bir kiyimni bir qancha syomkalarda kiyishga majbur bo‘layotgan holatlari haqida gapirib berdi.
— Aktrisalarda umuman pul yo‘q, buni hamma biladi. Balki xonandalar to‘yga chiqqani uchun ularda pul bordir, ammo aktrisalarda, kinoda umuman pul yo‘q. Shou-biznesga, kinoga pul tikayotgan odamlar bu sohalarga past nazar bilan qarab, iloji boricha kam pul sarflab, katta pulni olish harakatida bo‘lishadi.
San’atdan ko‘nglim qolishiga sabab bo‘layotgan jihatlaridan yana biri — syomkalarda uchta odam o‘tirsa, shu davrada bo‘lmagan inson haqida g‘iybat boshlanadi. Agar siz o‘sha davradan tursangiz, siz haqingizda ham gapirib boshlashadi. Kim bilan yurayotgan ekan, mashinasini kim olib beribdi, degan gaplar bolalab ketadi. Shunday uydirma gaplardan kimga nima naf, deb qolaman ba’zida.
Har bitta narsamni, qo‘limdagi telefonimgacha peshona terimga, o‘zimning pulimga sotib olganman. To‘rt yildan buyon qancha klip, serial, kinoda rol ijro etdim. Necha martalab Instagram’da o‘yinlar qildim. Imkonim boricha uyga pul olib kirishga ham harakat qilaman. Yana bu ishlarni o‘zimning kundalik xarajatlarimdan orttirib bajarganman. Kundalik xarajatlarim uchun ham juda ko‘p pul sarflayman. Yoki kim bilandir yurganimni, kimdandir qimmat sovg‘a olganimni eshitmagansizlar-ku. Har bir qimmat buyumimni o‘z pulimga olganimni biladigan guvohlarim ham bor, deydi aktrisa.
Imron va Durdona haqidagi mish-mishlar
Durdona Qurbonova xonanda Imronning kliplari orqali tanilgani sir emas. Ijodkorlar bir necha yil davomida hamkorlik qilib keldi. Ijoddagi hamkorlik hayotga ko‘chgani va ularning ishqiy munosabatlari haqida bundan bir necha yillar avval gap-so‘z tarqalgandi. Ammo ularning ikkisi ham bu gaplar asossiz ekanligi haqida aytishgan. Bundan so‘ng xonanda Imron 2021-yilda boshqa qizga uylangan va turmush o‘rtog‘ini ikki yil kutganini aytgan.
Bugungi kunda Imron va Durdona yana hamkorlikni davom ettirmoqda.
“Dog‘ tushmagan nom bilan qolishni istayman”
— Kelajakda aktrisa sifatida trendda bo‘lsam ham, bo‘lmasam ham, nomimga dog‘ tushmagan, boshi baland aktrisa bo‘lib qolishni xohlamayman. Trendda qolishni istayman, lekin nomimga dog‘ tushishini emas, deydi aktrisa.
“Quchoqlashish sahnalarini o‘zim ijro etmayman”
Durdona suratga olish jarayonlaridagi bir holatni ko‘rsatib, quchoqlashish kabi vaziyatlarda aslida qanday yechim bo‘lishini ko‘rsatdi.
Durdona Qurbonova kino va kliplarda suratga tushayotganda quchoqlashish sahnasida o‘zi bo‘lmaydi. Uning aytishicha, bu vaqtda sanʼatkorning o‘rniga dublyor qatnashadi. Shu sababli barcha kadrlar qizning orqasidan olinadi. Aktrisa nega bunday qilinishiga izoh bermagan. “Dizayn” jamoasi aʼzosi Qobil Karimberdiyev tasvirga olish jarayoniga dublyor bilan kelishni maslahat bergan.
Durdona Qurbonova qoidabuzarlik tufayli javobgarlikka tortilgan
Durdona Qurbonova avtomobil boshqarish jarayonida chap qo‘lida pardoz vositalari, o‘ng qo‘lida telefon tutgan holatdagi videotasvirini Instagram sahifasiga Stories ko‘rinishida joylashtirgandi.
“Suratga olish jarayonlariga shoshayotganimda har doim bo‘yanib ketaman. Qo‘limda bo‘yanadigan narsalarim, yonimda kosmetika. Yaxshiyam ko‘p pardoz qilmayman”, degan edi aktrisa videoda.
Bu holat jamoatchilik e’tiboriga tushib, Toshkent shahar IIBB YHXB tomonidan unga nisbatan Ma’muriy javobgarlik to‘g‘risidagi kodeksning 128-1-moddasi asosida ma’muriy bayonnoma rasmiylashtirilib, profilaktik suhbat o‘tkazilgan. Ushbu modda asosida Durdona Qurbonovaga 900 ming so‘m jarima belgilangan. Tergovchilarning ta’kidlashicha, bu kabi qoidabuzarlik qaytarilsa, u haydovchilik guvohnomasidan mahrum etilishi mumkin. Aktrisa jarima to‘lagani haqida video ham joylashtirgan.
“Xavotir olmanglar, mana, kelib jarima to‘lab ketyapman, ko‘nglingiz xotirjam bo‘lsin”, degan aktrisa.
Durdonaning ota-onasiga sovg‘asi
O‘tgan yili Durdona tug‘ilgan kuni munosabati bilan ota-onasining katta orzusini ro‘yobga chiqardi. U ota-onasiga hovli sovg‘a qildi va ularning uzoq yillik orzusini amalga oshirganini ma’lum qildi.
Izoh (0)