“Raqobat to‘g‘risida”gi qonun talablari buzilishi alomatlari bilan YandexGo’ga nisbatan ish qo‘zg‘atildi.
Raqobat qo‘mitasiga Uzum Market MCHJ XKning murojaati kelib tushgan bo‘lib, mazkur murojaatda YandexGo UB MCHJ tomonidan televideniye hamda ijtimoiy tarmoqlar orqali Yandex Market bo‘yicha reklama roligida YandexGo UB MCHJ tomonidan Uzum Market MCHJ XKga nisbatan insofsiz raqobat harakatlarini amalga oshirayotgani hamda uning ishchanlik obro‘siga putur yetkazayotganini ma’lum qilib chora ko‘rishni so‘ragan.
Yuqoridagilarga ko‘ra, qo‘mita maxsus komissiyasi tomonidan YandexGo UB MCHJga nisbatan “Raqobat to‘g‘risida”gi qonunning 21-moddasi talablari buzilishi alomatlari bilan belgilangan tartibda ish qo‘zg‘atildi.
Ushbu modda bilan xo‘jalik yurituvchi subyektlar yoki ularning manfaatlarini ko‘zlab boshqa shaxslar tomonidan raqobatchilarga nisbatan insofsiz raqobatni amalga oshirish, shu jumladan quyidagi harakatlarni amalga oshirish taqiqlangan:
- raqobatchini obro‘sizlantirish, ya’ni raqobatchi xo‘jalik yurituvchi subyektning faoliyatiga salbiy ta’sir ko‘rsatishi yoki uning ishchanlik obro‘siga putur yetkazishi mumkin bo‘lgan, u sotuvga taklif qilayotgan tovarning sifati va iste’mol xossalari to‘g‘risida, mazkur tovarni tayyorlash hamda undan foydalanish usullari va sharoitlari haqida, undan foydalanishdan kutilayotgan natijalar to‘g‘risida, tovarning muayyan maqsadlarga yaroqliligi haqida, tovarni sotuvga taklif etish shartlari, shu jumladan uning narxi to‘g‘risida yolg‘on, noaniq yoki buzib ko‘rsatilgan ma’lumotlarni tarqatish;
- noto‘g‘ri taqqoslash, ya’ni raqobatchi xo‘jalik yurituvchi subyektni yoki uning tovarini tovarning ustunligi haqida tasavvur hosil qiluvchi so‘zlardan yoki ramzlardan tovarning xolisona tasdiqqa ega bo‘lgan tavsifini yoki taqqoslash parametrlarini ko‘rsatmagan holda foydalanib taqqoslash;
- tovarning xususiyati, ishlab chiqarilish usuli va joyi, iste’mol xossalari, narxi va sifati, ishlab chiqaruvchining (bajaruvchining) kafolat majburiyatlari xususida iste’molchilarni chalg‘itish;
- tijorat sirini yoki qonun bilan qo‘riqlanadigan boshqa sirni, shu jumladan fan-texnikaga, ishlab chiqarishga yoki savdoga oid axborotni egasining roziligisiz olish, undan foydalanish, uni oshkor etish;
- tovar yoki moliya bozoriga raqobatchi xo‘jalik yurituvchi subyektning kirishiga to‘sqinlik qilishga yoki uni bozordan chetlashtirishga olib keluvchi harakatlarni sodir etish.
Qo‘mitaning bildirishicha, qo‘zg‘atilgan ishni ko‘rib chiqish yakunlari yuzasidan qo‘shimcha axborot taqdim etiladi.
Izoh (0)