Qoraqalpog‘istonda ta’lim sohasida poraxo‘rlik ortidan uch kishiga jinoyat ishi qo‘zg‘atilgani xabar qilingandi. Holat yuzasidan Maktabgacha va maktab ta’limi vazirligi munosabat bildirdi.
Keltirilishicha, 2024-yil yanvardan boshlab maktabgacha, umumiy o‘rta va maktabdan tashqari ta’lim tashkilotlarining pedagog kadrlari attestatsiyasi Maktabgacha va maktab ta’limi vazirligi tomonidan o‘tkazib kelinmoqda.
Malaka (test) sinovlarini (shuningdek, kasbiy sertifikatlash, menejerlik sertifikati sinovlarini ham) shaffof, adolatli, xolis o‘tkazish maqsadida har ikkala bosqich ham kompyuterda real vaqt rejimida (onlayn), FaceID — yuzni tanib olish orqali o‘tkaziladi.
Qayd etilishicha, ayrim pedagoglar tomonidan turli qing‘ir yo‘llar bilan toifa olishga urinish holatlari ham uchrab turibdi. O‘tgan malaka sinovlarida turli taqiqlangan vositalar, xususan aloqa vositalaridan foydalanish holati bo‘yicha 200 dan ortiq nomzodlar sinovlardan chetlashtirilgan.
Xususan, joriy yildagi sinovlarda respublika bo‘yicha jami 79 nafar, shu jumladan 68 nafari aloqa qurilmalaridan foydalangani sababli jarayondan chetlashtirildi.
Ayrimlar esa, firibgarlik yo‘li bilan testdan o‘tkazib qo‘yishni va’da qilib, pedagoglar ishonchiga kirmoqda, ulardan pul olib jinoyatga qo‘l urish holatlari ham uchrayapti.
Ushbu holatlarni bartaraf etish, har qanday turdagi qoidabuzarliklarni oldini olish maqsadida, Maktabgacha va maktab ta’limi vazirligi tegishli organlar, xususan Bosh prokuratura bilan hamkorlikda ishlar olib bormoqda. Aniqlangan holatlar bo‘yicha huquqiy baho berish uchun barcha ma’lumotlar tergov organlariga yetkazilmoqda.
Nukus shahridagi umumta’lim maktabi o‘qituvchisi mazkur maktab direktori o‘rinbosarining topshirig‘iga asosan, kasbiy sertifikat olish bo‘yicha sinovlaridan o‘tkazib berish evaziga Chimboy tumanida ishlovchi hamkasbidan 1000 dollar olgan vaqtida DXX va IJQKD xodimlari tomonidan ashyoviy dalillar bilan ushlangandi.
Tergovga qadar tekshiruv davomida aniqlanishicha, direktor o‘rinbosari 100 nafardan ortiq o‘qituvchini davlat attestatsiyasidan o‘tkazib berish evaziga har biridan 1000-1500 AQSH dollari miqdorida pul olib, bu haqda o‘zining shaxsiy bloknotlari va qog‘ozlarda aks ettirib kelgan.
Shuningdek, ushbu noqonuniy ishga Qoraqalpog‘iston Respublikasi maktabgacha va maktab ta’limi vazirligining Pedagoglarning bilim va malakasini baholashni tashkil etish sho‘basi bosh metodisti ham aloqadorligi aniqlanib, u o‘qituvchilardan davlat attestatsiyasidan o‘tkazishga yordam berish evaziga yig‘ilgan 10 450 dollarni ixtiyoriy ravishda topshirgan.
Shu bilan birga, o‘qituvchilarni shaxsiy ko‘rikdan o‘tkazmasdan, test jarayoniga uyali aloqa vositalari bilan kirishlariga sharoit yaratib bergan Milliy gvardiya xodimining ham o‘z vazifasiga sovuqqonlik bilan yondashgani ma’lum bo‘lgan.
Aniqlanishicha, ular pora tariqasida olingan pullarni o‘zaro taqsimlagan.
Izoh (0)