Sudyalar oliy maktabida sudyalik lavozimiga nomzodlarni tayyorlash kursi tinglovchilari yakuniy davlat attestatsiya sinovlari topshirmoqda. Bu haqda Sudyalar oliy kengashi axborot xizmati “Daryo”ga ma’lum qildi.
Sudyalar oliy maktabi direktori o‘rinbosari Dilshod Isroilovning aytishicha, 2023—2024-o‘quv yilida Kengash huzuridagi Sudyalar oliy maktabining sudyalik lavozimlariga tayyorlash kursiga 153 nafar tinglovchi qabul qilingan bo‘lib, ularning 48 nafari jinoyat huquqi, 47 nafari fuqarolik huquqi, 30 nafari iqtisodiy huquq va 28 nafari ma’muriy huquq ixtisosligi bo‘yicha tahsil oldi.
“Kuni kecha ma’muriy huquq ixtisosligi bo‘yicha tahsil olgan 28 nafar tinglovchilarning barchasi yakuniy davlat attestatsiya sinovlaridan muvaffaqiyatli o‘tdi. Ayni kunlarda jinoyat, fuqarolik va iqtisodiy huquq ixtisosligi bo‘yicha tahsil olgan tinglovchilar shunday sinovdan o‘tkazilmoqda.
Yakuniy davlat attestatsiya sinovlaridan muvaffaqiyatli o‘tgan tinglovchilarga tegishli diplom beriladi va ular ilk bor sudyalik lavozimiga tayinlanish uchun Sudyalar oliy kengashining ochiq tanlovida ishtirok etish huquqiga ega bo‘ladi”, deydi Dilshod Isroilov.
Qo‘shimcha qilinishicha, o‘tgan uch yilda Sudyalar oliy maktabining Sudyalik lavozimiga nomzodlarni tayyorlash kursida 345 nafar tinglovchi tahsil olgan bo‘lsa, ularning 323 nafari (93,6 foizi) sudyalik lavozimlariga tayinlangan.
Ma’lumot uchun, Sudyalar oliy maktabi sudyalik lavozimlariga nomzodlarni tayyorlash, sudyalar va sudlar apparati xodimlarini qayta tayyorlash, ularning malakasini oshiruvchi davlat ta’lim va ilmiy-tadqiqot muassasasi hisoblanadi.
Izoh (0)