“Maktabgacha va umumiy o‘rta taʼlim tashkilotlarini attestatsiyadan o‘tkazish hamda taʼlim sifati monitoringini amalga oshirish tizimini takomillashtirish chora-tadbirlari to‘g‘risida”gi Vazirlar Mahkamasi qarori qabul qilindi, deb xabar beradi Norma.
Maktabgacha hamda umumiy o‘rta taʼlim tashkilotlarini attestatsiyadan va davlat akkreditatsiyasidan o‘tkazish Taʼlimni rivojlantirish respublika ilmiy-metodik markazi bilan kelishilgan holda amalga oshiriladi. Attestatsiyaning asosiy prinsiplari: mustaqillik, xolislik, oshkoralik, shaffoflik, davriylik, majburiylik.
Tasdiqlangan Maktabgacha va umumiy o‘rta taʼlim tashkilotlarini attestatsiyadan hamda davlat akkreditatsiyasidan o‘tkazish tartibi to‘g‘risidagi nizom quyidagilarni ham belgilaydi:
- attestatsiya komissiyalarini tashkil etish tartibi va ularning tarkibi;
- attestatsiyadan o‘tkazish haqida xulosa;
- xalqaro akkreditatsiya tashkilotlarini ro‘yxatdan o‘tkazish tartibi, shuningdek ularga qo‘yiladigan talablar;
- taʼlim tashkilotlarini akkreditatsiyadan o‘tkazish;
- maktabgacha va umumiy o‘rta taʼlim tashkilotlarini attestatsiyadan o‘tkazish mezonlari.
Davlat umumiy o‘rta taʼlim tashkiloti har yili xavf-xatarlar tahliliga asoslangan taʼlim sifati monitoringini o‘tkazish uchun o‘z faoliyatini ichki baholaydi va uning natijasi bo‘yicha to‘plangan maʼlumotlar hamda materiallarni onlayn tarzda taʼlim sifati monitoringi elektron platformasi orqali Maktabgacha va maktab taʼlimi vazirligiga yuboradi.
Maktabgacha va maktab taʼlimi vazirligi davlat umumiy o‘rta taʼlim tashkilotlarida xavf-xatarlar tahliliga asoslangan taʼlim sifati monitoringini amalga oshiradi.
Vazirlikka 2024-yil 1-avgustga qadar taʼlim sifati monitoringi hamda akkreditatsiya va tegishli sertifikatlar berish elektron platformasini ishga tushirish topshirildi.
Oliy taʼlim, fan va innovatsiyalar vazirligi huzuridagi Bilim va malakalarni baholash agentligi:
- mandat.uzbmb.uz elektron platformasi Maktabgacha va maktab taʼlimi vazirligining taʼlim sifati monitoringini yuritishga mo‘ljallangan elektron platformasiga “Elektron hukumat” tizimining idoralararo integratsiyalashuv platformasi orqali integratsiya qilinishini;
- har yili 10-oktyabrga qadar oliy taʼlim tashkilotlariga qabul imtihonlarida qatnashgan umumiy o‘rta taʼlim tashkilotlarining bitiruvchilari soni, ularning fanlar kesimidagi va jami to‘plagan ballari bo‘yicha maʼlumotlar elektron shaklda taqdim etilishini taʼminlaydi.
Hujjat Qonun hujjatlari maʼlumotlari milliy bazasida eʼlon qilingan va 2024-yil 15-fevraldan kuchga kirdi.
Avvalroq O‘zbekistonda ayrim pedagoglar kasbiy sertifikatlash sinovlaridan o‘tkazilishi to‘g‘risida xabar berilgandi. Vazirlar Mahkamasining qarori bilan davlat umumiy o‘rta ta’lim tashkilotlari pedagog kadrlarini kasbiy sertifikatlash bo‘yicha davlat xizmatlarini ko‘rsatishning ma’muriy reglamenti tasdiqlangan.
Izoh (0)