O‘zbekistonda to‘lovga qobiliyatsizlik sohasidagi qonunchilik hujjatlari takomillashtirilgani munosabati bilan hukumatning ayrim qarorlariga o‘zgartirish va qo‘shimchalar kiritildi, deb xabar beradi Norma.
Hujjat bilan sud boshqaruvchilari, ularni attestatsiyadan (qayta attestatsiyadan) o‘tkazish va malaka attestatini berish tartibi to‘g‘risidagi nizomga o‘zgartirish va qo‘shimchalar kiritilmoqda.
Sud boshqaruvchisining 1-3 toifadagi malaka attestatini olish uchun imtihondagi eng kam to‘g‘ri javoblar foizi o‘zgarmoqda:
- 4-toifa uchun – kamida 50 foiz (o‘zgarishsiz);
- 3-toifa uchun – kamida 65 foiz (ilgari 60 foiz);
- 2-toifa uchun – kamida 75 foiz (ilgari 70 foiz);
- 1-toifa uchun – kamida 85 foiz (ilgari 75 foiz);
nomzodlar tomonidan yuqoriroq toifadagi attestatni olish istagi bildirilganda qayta test topshirish uchun qayta murojaat qilish muddati belgilanmoqda: birinchi attestatsiyadan kamida 1 oydan so‘ng;
sud boshqaruvchilari tomonidan belgilangan talablar buzilganda attestatsiya tomonidan ushbu holatlarni ko‘rib chiqish tartibi belgilanmoqda.
Quyidagi holatlar ishni ko‘rib chiqish uchun asos etib belgilanmoqda:
- Davlat aktivlarini boshqarish agentligi va uning hududiy organlarining sud boshqaruvchisi faoliyatida aniqlangan huquqbuzarlik alomatlari to‘g‘risida maʼlumotnoma va tekshirish dalolatnomalari;
- davlat boshqaruvi organlari, mahalliy hokimiyat organlarining maʼlumotlari, jismoniy va yuridik shaxslarning ariza va shikoyatlari, OAVdagi maʼlumotlar;
- sud va huquqni muhofazaa qiluvchi organlarning sud boshqaruvchisi tomonidan huquqbuzarlikka yo‘l qo‘yilgani haqida maʼlumot, taqdimnoma, ajrim.
Ishni ko‘rib chiqish natijasi bo‘yicha komissiya qaror qabul qilib Davaktiv agentligiga yuboradi.
Qarorga asosan Davaktiv agentligi sud boshqaruvchisiga kamchiliklarni bartaraf etish uchun bir oylik (bir oygacha uzaytirish imkoniyati mavjud) muhlat beradi yoki attestatni to‘xtatib turish yoxud to‘xtatish haqida qaror qabul qiladi.
Shuningdek, soxta bankrotlik, bankrotlikni yashirish va qasddan bankrotlikka olib kelish alomatlarini aniqlash qoidalariga o‘zgartirish kiritilmoqda. Unga ko‘ra, agarda qarzdor so‘nggi 2 yil ichida faoliyat yuritmagan bo‘lsa, sud boshqaruvchisi tomonidan qarzdorning moliya xo‘jalik faoliyati yuritgan davrdagi 2 yillik faoliyati tahlil qilinadi.
Hujjat qonun hujjatlari maʼlumotlari milliy bazasida eʼlon qilingan va 22-iyuldan kuchga kirdi.
Izoh (0)