Bu haftada o‘zbek matbuotida o‘ta shov-shuvli va munozarali voqealar uchramadi. Amaldorlar qovun tushirmadi. Asli paradoksal voqea va salbiy xabarlarni tarqatishni biz ham istamaymiz. Shu bois xalqimiz hayotiga oid muhim yangiliklarni havola qilamiz. Marhamat.
Xalq ta’limi vaziri Sherzod Shermatov nofaol maktablarga chaqiriq tashladi.
“Bitiruvchilarining birortasi ham OTMga o‘qishga kirmagan maktablar birinchi bo‘lib attestatsiya va akkreditatsiyadan o‘tadi”, dedi vazir. Surxondaryo viloyati Jarqo‘rg‘on tumanida maktablar haqida gapirarkan, “bironta ham bitiruvchisi OTMga kirmagan maktablarning rahbariyati va pedagogik jamoasi esa o‘z vijdonlari oldida o‘zlariga savol berishlari kerak – qanchalik ularga yuklatilgan vazifalarni insof bilan bajarayotganlari haqida. Tumandagi ahvol, bolalarning oilaviy sharoiti, umumiy respublikadagi boshqa muammolar yuqoridagi maktablarga deyarli bir xil ta’sir ko‘rsatadi, ammo bittasi shunday yaxshi natija ko‘rsatmoqda, sakkiztasi esa umuman natija ko‘rsatmagan”, dedi Shermatov.
Statistikaga ko‘ra, respublikaning boshqa hududlaridan bitiruvchilarining barchasi (100 foiz) OTMga kirgan maktablar ham talaygina, lekin bironta bitiruvchisi OTMga kirmaganlari undan ancha ko‘p.
Shunday qilib, bittayam bitiruvchisi OTMga kirmagan maktab o‘qituvchilari bu yil ancha terlaydigan ko‘rinadi. O‘z o‘rnida Sherzod Shermatov yaxshi natija ko‘rsatgan maktablar qanday qilib bunga erishganini sanab o‘tgan.
* * *
Marhamatda O‘zbekiston xalq shoiri Muhammad Yusufga uy-muzey qurish uchun ajratilgan yer tadbirkorga berib yuborilibdi. Bundan, tabiiyki, shoirning oilasi ranjigan. Xo‘sh, asli nima bo‘lgandi? “Kun.uz” jurnalistlari voqeani aniqlashtirgan.
Uch yil avval Marhamatning avvalgi hokimi marhum shoirning ayoliga tumanda shoir xotirasiga uy-muzey qurishni taklif qiladi va yer ajratadi. Uy-muzey xalq hashari bilan qurilishi aytiladi. 2016-yilda tuman hokimining qarori chiqadi. Ammo 2019-yilda ushbu qaror bekor qilinmasdan ayni o‘sha yer maydonini tadbirkorga biznes qilish uchun berish haqida ikkinchi qaror chiqadi. Jurnalist tadbirkor bilan uchrashganda u shoirning oilasiga bir oz pul berganligini aytgan. Shoirning oilasi buni rad qilmagan, ammo pul unda turganini, yerni qaytarishsa, pulni ham darhol qaytarishini ma’lum qilgan. Asli uy-muzey qurilishiga hokimlik ham tengdan mas’ul edi, biroq yerni shoir oilasiga qaror chiqartirgan hokim allaqachon ishdan ketib o‘rniga yangisi bo‘lgan. Darvoqe, tadbirkor ushbu yerda uch yil davomida qurilish amalga oshmaganligi uchun ish boshlaganini aytgan, shuningdek, binoda shoir xotirasi uchun alohida zal ajratib haykal qo‘yilishi, eksponatlar uchun sharoit qilib berilishini bildirgan.
Bu chalkashliklar nafaqat shoir xotirasiga befarqlikni, shu bilan birga mamlakatimizda yer ajratish, hokimlik qarorlari va kadastr ishlari hamon o‘lda-jo‘lda yotganligidan dalolat beradi.
* * *
Partiyalar saylovda g‘olib bo‘lsa, bosh vazirlikka kimni tavsiya qilishini bildirdi. Adolat SDP g‘olib bo‘lsa, adliya vaziri Ruslanbek Davletovni bosh vazirlikka tavsiya qiladi. Bordi-yu, Xalq demokratik partiyasi g‘alaba qozonsa, unda bosh vazirning birinchi o‘rinbosari Ochilboy Ramatov nomzodi ilgari suriladi. Liberal-demokratlarimiz amaldagi bosh vazir Abdulla Aripovning o‘zini yoqlaydi. Milliy tiklanish partiyasi esa ehtiyotkorlikni namoyish qilib, nomzodini sir saqladi. Darvoqe, siyosatda dastlabki qadamlarini tashlayotgan ekologlar partiyasi “O‘zkimyosanoat” AJ raisi Odil Temirovni bosh vazir sifatida ko‘rish istagini bildirdi.
Bu siyosiy voqea shunisi bilan muhimki, ilgari partiyalar g‘olib bo‘lsa, bosh vazirlikka kimni tavsiya qilishi aytilmas, fuqarolar ham bu bilan qiziqmasdi.
Konstitutsiyamizga asosan, siyosiy partiya bosh vazir nomzodini prezidentga taklif qiladi va uni prezident ko‘rib chiqib, tasdiqlashi uchun Oliy Majlis palatalariga kiritadi.
* * *
Shahrisabz tumani hokimining o‘rinbosari pora bilan qo‘lga tushdi. U yerga egalik qilish huquqini olib berish uchun pul olayotganda protsessual tartibda ushlangan va jinoiy ish qo‘zg‘atilgan. Hokimiyat mansabdorlarining pora olishi tabiiy hol, bo‘lsa nega bu qadar tipik holatni dayjestimizga olib chiqdik? Gap shundaki, pora miqdori juda katta yoki juda kichkina bo‘lsa, diqqatga sazovor bo‘lib, u joylardagi noqonuniy oldi-berdilar hajmi bo‘yicha ma’lumot beradi. Shahrisabz tumani “zamhokimi” yuz minglab dollar bilan emas, atigi yuz dollar bilan qo‘lga tushgan.
* * *
Endi osonlikcha daraxt kesilishiga chek qo‘yildi. O‘zbekiston prezidentining farmoni chiqdi, unda Davlat ekologiya qo‘mitasi, O‘zbekiston ekologik partiyasi va jamoatchilikning davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriy joriy etish to‘g‘risidagi taklifi ma’qullangan.
Moratoriy 2019-yil 1-noyabrdan 2020-yil 31-dekabrgacha amal qiladi. Amal qilish davrida vakolatli davlat organlariga davlat o‘rmon fondiga kirmaydigan daraxtlar va butalar qimmatbaho navlarining kesilishiga ruxsatnoma berish man etiladi. Ammo farmonda “ba’zi holatlar mustasno ekanligi” belgilab qo‘yilgan.
* * *
Toshkentda Shanxay hamkorlik tashkiloti hukumat rahbarlari kengashi yig‘ilishi o‘tkazildi. Unda Rossiya, Qozog‘iston, Tojikiston, Qirg‘iziston va boshqa davlatlar bosh vazirlari ishtirok etdi. Bu yirik tadbirga Shanxay hamkorlik tashkiloti huzuridagi kuzatuvchi davlatlar – Afg‘oniston, Belarus, Mo‘g‘uliston va Eron hukumatlari rahbarlari ham taklif etilgan edi. ShHT hukumat rahbarlari kengashi majlisi davomida 14 ta hujjat imzolandi, ushbu hujjatlardan 12 tasini bevosita bosh vazirlar tasdiqladi.
Eslatib o‘tamiz, ShHT dunyo aholisining deyarli yarmi yashovchi davlatlarni o‘zida jamlagan tashkilot. Yevrosiyo hududining 60 foizini egallagan ShHT davlatlarining dunyo YaIMdagi ulushi 30 foizdan ortiqroq. Garchi qamrovi juda keng bo‘lsa-da, bu tashkilot harbiy blok hisoblanmaydi va militaristik rejalar tuzmaydi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi voqif bo‘ling.
Izoh (0)