Indoneziyadagi eng faol vulqonlardan biri Leotobi Laki-Laki 17-iyun kuni otilishni boshladi. Vulqon 11 kilometrdan ortiq balandlikka tutun va kul otgan. Bu haqda BBC xabar berdi.
Vulqon mahalliy vaqt bilan soat 17:35 da (BST 10:35) otilgan. Uning krateri 1 584 metr balandlikda joylashgan. Zarar va qurbonlar haqida xabar berilmagan.
Geologiya agentligi rahbari Muhammad Vafid vulqondan 7 kilometr masofada hech kim hech qanday faoliyat olib bormasligi kerakligi haqida ko‘rsatma bergan. Kuchli yomg‘ir yog‘gan taqdirda, laxar suv toshqinlari — vulqon materiallarining loy yoki chiqindilar oqimi bo‘lishi mumkinligi haqida ham ogohlantirilgan. Shuningdek, aholidan vulqon kulidan himoyalanish uchun yuz niqoblarini taqish so‘ralgan.
Tabiiy ofatlar oqibatlarini yumshatish milliy agentligi kamida bitta qishloq evakuatsiya qilingani, izolyatsiya zonasidan tashqaridagi yana bir nechta qishloqda kul yomg‘iri yog‘gani haqida xabar bergan. Hukumat vakillari vulqon atrofidagi aholini xavfsiz joylarga evakuatsiya qilishga chaqirgan. Chunki mamlakatda zilzilalar sodir bo‘lib turibdi, bu esa vulqon faolligi davom etayotganidan dalolat beradi.
So‘nggi marotaba kuchli vulqon otilishi noyabr oyida sodir bo‘lgan edi. O‘shanda 9 kishi halok bo‘lib, minglab odamlar ko‘chishga majbur bo‘lgandi. Kul buluti sababli parvozlarni ham bekor qilishga to‘g‘ri kelgandi.
Izoh (0)