Rossiyaning Kamchatka yarim orolida Klyuchevskaya Sopka vulqoniga chiqish chog‘ida sakkiz kishi halok bo‘ldi, deb yozadi “RBK”.
12 kishi, shu jumladan, ikki nafar giddan iborat guruh a’zolari halok bo‘lgan. Ularning to‘qqiz nafari avvalroq 3300 metr balandlikdan tepaga ko‘tarilishni boshlagan, hodisa 4200 metr balandlikda yuz bergan.
Mi-8 vertolyoti qidiruv-qutqaruv otryadini Klyuchevskaya Sopka vulqoniga 1663 metr balandlikka chiqarib qo‘ygan. 20 m/s tezlikdagi shamol hamda vulqon yonbag‘irlaridan ko‘tarilayotgan kul tufayli, vertolyot katta balandlikka ko‘tarila olmagan.
Vertolyotdan tushganidan keyin qutqaruvchilar 3,3 ming metr balandlikka, vulqonshunoslar uychasiga qarab yo‘l olgan, u yerga yarim tunga qadar yetib borishi kutilmoqda. Ertasi kuni esa ular 4158 metr balandlikka chiqishi kerak bo‘ladi.
30-avgust kuni o‘n nafar sayyoh va ikki giddan iborat guruh Yevrosiyodagi eng baland harakatdagi vulqon — 4,8 ming metrlik Klyuchevskaya Sopkaga chiqishni boshlagan.
2-sentabr kuni ularning to‘qqiz nafari 3,3 ming metr balandlikdan ko‘tarila boshlagan, qolganlar esa lagerda qolgan. Ertasi kuni gidlardan biri qutqaruvchilar bilan bog‘lanib, besh nafar sayyoh 4,2 ming metr balandlikdagi vulqondan yumalab ketib, halok bo‘lgani, yana bir gid oyog‘ini sindirib olgani, bir kishi esa hushsiz holatda ekanini ma’lum qilgan.
Qutqaruvchilar akklimatizatsiya o‘tib, 4-sentabr kuni sayyohlar halok bo‘lgan joyga yetib olish uchun 3,3 ming metr balandlikka chiqishi kerak edi, biroq shamol tufayli vertolyotni zarur joyga qo‘ndirishga muvaffaq bo‘linmadi.
5-sentabr kuni ertalab Kamchatka o‘lkasi hukumati halok bo‘lganlar soni sakkiz kishiga yetganini ma’lum qildi.
Tergov qo‘mitasi ehtiyotsizlik tufayli ikki yoki undan ortiq shaxsning o‘limini keltirib chiqarish haqidagi modda bo‘yicha jinoyat ishi qo‘zg‘adi. Ushbu ish bo‘yicha kim sudlanishiga aniqlik kiritilmagan.
Izoh (0)