Rossiya va Tojikiston “Sangto‘da GES-1” qo‘shma korxonasi oldidagi elektr energiyasi yetkazib berish bo‘yicha to‘plangan qarzni bosqichma-bosqich hisobdan chiqarish to‘g‘risidagi bitimni imzoladi. Bu haqda Tojikiston parlamenti quyi palatasi tasdiqlagan bayonnoma ma’lumotlarida ma’lum bo‘ldi.
Ma’lum qilinishicha, Rossiya oldidagi qarzning umumiy miqdori 300 million dollarga teng. Aprel oyi oxirida Rossiya Federatsiyasi energetika vaziri Sergey Tsivilev va Tojikiston energetika vaziri Daler Juma imzolagan hujjatga ko‘ra, qarzdorlik 2034-yilgacha bosqichma-bosqich bekor qilinadi.
Aslida Rossiya Tojikiston aholisining elektr energiyasini dotatsiya qilmoqda. 670 MVt quvvatga ega “Sangto‘da GES-1” mamlakatda ishlab chiqarilayotgan elektr energiyasining qariyb 12 foizini ta’minlaydi. Stansiya ishlab chiqarayotgan energiyaning yagona xaridori “Barqi tojik” davlat energetika xoldingi hisoblanadi.
Loyiha bo‘yicha tomonlarning ulushli kapitali umumiy hajmi 847 million dollarni tashkil etadi. Investitsiyalarni qaytarish muddati 20 yildan 35 yilgacha — 2048-yilgacha uzaytirildi.
Ta’kidlanishicha, hujjat bilan elektr energiyasini sotib olish tariflari masalasi ham tartibga solindi.
Tojikiston qarzlarni to‘lashda Rossiyadan “sovg‘a” olgan MDHdagi yagona davlat emas. Joriy yil bahorida Rossiya Federatsiyasi prezidenti Vladimir Putin Belarus davlat kreditlari bo‘yicha to‘lovlarini 7 yildan 12 yilgacha kechiktirishni ma’qulladi, bu qarorni respublika byudjetiga qarz yukini kamaytirish zarurati bilan izohladi. Hukumatlararo kelishuvga muvofiq, Belarus qarzi bo‘yicha to‘lovlar 2031-yildan 2036-yilgacha bo‘lgan davrga ko‘chiriladi. Qayta tuzilishi kerak bo‘lgan qarzning umumiy summasi 800 million dollarga baholanmoqda.
2023-yilda Rossiya Kubaga ikkita elektr stansiyasi qurilishi uchun ajratilgan 1,2 milliard yevrolik kredit to‘lovlarini kamida besh yilga kechiktirdi. Bundan tashqari, Moskva allaqachon Kubaning 32 milliard dollarlik qarzidan voz kechgan.
O‘tgan yili Rossiya Gvineya Bisauning 26,7 million dollarlik qarzidan kechdi, yana 940 ming dollari qayta tuziladi. Shunday choralar avvalroq Somaliga nisbatan ham ko‘rilgan, unga 691 million dollarni qaytarmaslikka ruxsat berilgandi. Umuman olganda, Rossiya Afrika davlatlarining 20 milliard dollarlik qarz majburiyatlarini bekor qildi. Ushbu mablag‘ning katta qismi SSSRdan tarixiy qurol-yarog‘ yetkazib berish bilan bog‘liq: Angola 3,5 milliard, Efiopiya 5 milliard, Jazoir 5,7 milliard va Liviya 4,5 milliard dollar miqdoridagi qarzdorlikdan ozod qilindi.
Izoh (0)