Shvetsiya sudi shvetsiyalik Usama Krayemni 2015 yilda iordaniyalik uchuvchi Muat al-Kaseasbexning qatl etilishida ishtirok etgani uchun umrbod qamoq jazosiga hukm etdi. Bu haqda SVT xabar bermoqda.
Ma’lum qilishicha, 2014 yil dekabrida Suriyaning Raqqa shahri yaqinida F-16 qiruvchi samolyotining qulatilishi bilan bog‘liq teraktni o‘sha paytda hududni nazorat qilgan “Islomiy davlat” terrorchilik guruhi o‘z zimmasiga olgan.
O‘shanda 26 yoshli uchuvchi, Iordaniya harbiy-havo kuchlari katta leytenanti asirga olingan. 2015-yil boshida jangarilar uni qafasga qamab, tiriklayin yoqib yuborgan.
Tergov ma’lumotlariga ko‘ra, 32 yoshli Krayem 2014-yilning sentyabrida ISHID safida jang qilish uchun Suriyaga kelgan. U uchuvchini qatl etishda ishtirok etgan qurollangan va niqoblangan jangarilardan biri sifatida aniqlangan.
2025-yilning may oyida Krayemga og‘ir harbiy jinoyatlar va terrorchilik harakatlarini sodir etganlik ayblovi qo‘yilgan. Ilgari u Parij va Bryusseldagi teraktlarda ishtirok etgani uchun Fransiya va Belgiyada ham hukm qilingan edi.
Sud uni aybdor deb topib, Shvetsiyada mumkin bo‘lgan eng og‘ir jazo — umrbod qamoq jazosini tayinlagan.
Izoh (0)