Xiaomi kompaniyasi 23 000 Paskal so‘rish kuchiga ega bo‘lgan yangi Mijia Robot Vacuum Mop 5 Pro robot-changyutgichini taqdim etdi. Qurilma ikkita robotsimon cho‘tka bilan jihozlangan bo‘lib, ular polni bir vaqtda ham supurish, ham yuvish vazifasini bajaradi.
Uskuna sun’iy intellekt tizimi asosida ishlaydi. Uchta panoramali kamera yordamida changyutgich 200 dan ortiq turdagi predmetlarni aniqlay oladi va 47 xil turdagi tozalash ishlarini bajaroladi.
Yangilangan dok-stansiya o‘z-o‘zini tozalash va issiq havo bilan quritish funksiyalariga ega bo‘lib, inson omili aralashuvini kamaytiradi. Qurilma 75 kun davomida mustaqil ravishda uylarni changdan tozalashi mumkin. Uning suv ta’minoti tizimiga ega versiyasi esa avtomatik ravishda suv bakini to‘ldirish va yuvish vositasini tozalash kabi ishlarni ham bajara oladi.
Mijia Robot Vacuum Mop 5 Pro Xiaomi ekotizimiga ulanadi va ovoz orqali boshqariladi. Qurilmani masofadan turib tozalash jadvalini belgilash, taqiqlangan zonalarni belgilash va boshqa aqlli qurilmalar bilan sinxronlashtirish mumkin.
Changyutgich ikki xil modifikatsiyada taqdim etilgan: birinchisi — suv bakiga ega bazaviy versiya, ikkinchisi — suv ta’minoti hamda chiqindilarni to‘kish tizimi bilan jihozlangan kengaytirilgan variant. “Aqlli” changyutgichlar narxlari 4 999 yuan (o‘rtacha 700 AQSH dollari)dan boshlanadi.
Izoh (0)