“Vagner” Ukrainadagi urush uchun Turkiyadan qurol sotib olmoqchi bo‘lgan — WP

Internetda tarqalgan Pentagonning maxfiy hujjatlariga ko‘ra, AQSH razvedkasi Rossiyaning “Vagner” kompaniyasi fevral oyi boshida vositachilar orqali Turkiyadan Ukrainadagi urush uchun qurol sotib olishga urinayotganini bilgan. Bu vositachilar Afrikadagi Mali davlati bo‘lishi kerak edi, deb yozadi Washington Post.

Maxfiy hujjatlarga ko‘ra, Rossiyaning “Vagner” vakillari NATO a’zosi bo‘lgan Turkiyaga qurol-yarog‘ va texnika sotib olish bo‘yicha kelishib olish uchun tashrif buyurgan. Hujjatlarda “vagnerchilar” fevralda turkiyalik aloqador shaxslar bilan vositachilar orqali qurol sotib olish masalasini muhokama qilish uchun uchrashuvlar o‘tkazgani keltirilgan. Afrikaning Mali davlati ana shunday vositachilarga aylanishi kerak edi. Ushbu mamlakat prezidenti vazifasini bajaruvchi Assimi Goita Mali “Vagner” nomidan Turkiyada qurol sotib olishi mumkinligini tasdiqlagan.

Maxfiy hujjatlarda Turkiya hukumati bu muzokaralar xabardor bo‘lgani va bu muvaffaqiyatli o‘tgan-o‘tmagani haqida aniq ma’lumot berilmagan. Turkiya hukumati vakili bunga izoh berishdan bosh tortgan, Malining AQSHdagi elchixonasi esa tushuntirish so‘roviga javob bermagan. 

Shuningdek, AQSH razvedka hujjatlarida “Vagner”ning rossiyalik asirlarni Ukrainadagi urushga jalb qilish rejalari haqida so‘z boradi va Rossiy Qurolli kuchlari “Vagner”ga qaram bo‘lib qolgani ta’kidlanadi.

“Pentagonning mazkur maxfiy hujjatlari AQSH razvedkasi Rossiya armiyasiga chuqur kirib borganini va Ukrainani hujumlar haqida oldindan ogohlantirishi hamda Rossiya Qurolli kuchlarining kuchli va zaif tomonlarini ishonchli baholay olishini ko‘rsatadi”, — deyiladi xabarda.

Eslatib o‘tamiz, 7-aprel kuni Pentagonning Ukraina Qurolli Kuchlarining bo‘lajak qarshi hujumi bilan bog‘liq maxfiy hujjatlari internetda sizib chiqqani haqida ma’lumot paydo bo‘lgan. Mazkur ma’lumotni Amerikaning The New York Times nashri e’lon qilgan.