Isroil Tehrondan kelayotgan yadroviy tahdidga qarshi turish uchun Eron oliy rahnamosi Oyatulloh Ali Xomanaiyni ham o‘ldirishi mumkin. Bu haqda isroillik yuqori martabali amaldorga tayanib The Wall Street Journal xabar bermoqda.
Isroillik amaldorga ko’ra, Oyatullohning o‘ldirilishi Isroil uchun “tabu emas”. Isroil va Eron o‘rtasidagi urush “Tehron o‘z yadroviy dasturidan voz kechmaguncha yoki Isroil uni qayta tiklash imkoniyatidan butunlay mahrum qilmaguncha” davom etadi.
“Isroil Oyatulloh Ali Xomanaiyni yo‘q qilish imkoniyatini istisno etmaydi, lekin bu ko‘plab omillarga bog‘liq”, deya xabar bergan Isroilning 12-kanali hukumatidagi o‘z manbasiga tayanib.
Qayd etilishicha, Isroil mudofaa armiyasi zarbalari “nafaqat yadroviy infratuzilmaga qarshi, balki dushmanning siyosiy va harbiy barqarorligiga putur yetkazish” uchun ham amalga oshirilmoqda.
Eron-Isroil mojarosi
13-iyunga o‘tar kechasi Isroil Eron yadro quroli yaratishga yaqinlashgani sababli yadroviy, harbiy obyektlar va yuqori martabali harbiylar joylashgan manzillarga hujum qildi. Zarbalar oqibatida Islom inqilobi qo‘riqchilari korpusining bir necha rahbarlari va eronlik fizik-yadroshunoslar halok bo‘ldi. Ular orasida Korpus qo‘mondoni Husayn Salamiy, Eron Qurolli kuchlari bosh shtabi boshlig‘i Muhammad Baqeriy, IIQK “Xotam al-Anbiyo” bo‘linmasi qo‘mondoni G‘ulom Ali Rashid, shuningdek, olimlar Faridun Abbosiy Davoniy va Ozod Muhammad Mahdiy Tehronchiy bor. Jami 78 kishi halok bo‘ldi, 320 dan ortiq kishi jarohat oldi.
Eron oliy rahbari Isroilning zarbalarini urush e’loni deb atadi. “Urushni ular boshlashdi. Biz ularning o‘sha yovuzligidan keyin omon qolishiga yo‘l qo‘ymaymiz”, dedi Ali Xomanaiy. O‘sha kuni kechqurun Islom inqilobi qo‘riqchilari korpusi Isroilga qarshi “Haqiqiy va’da-3” javob operatsiyasi boshlanganini e’lon qildi. Eron Isroilga uch marta raketa zarbalari berdi.
Izoh (0)