Rossiyada ishlamayotgan, o‘qimayotgan hamda barmoq izini topshirmagan va rus tilini o‘rganmagan migrantlarni chiqarib yuborish taklif qilindi. Bu haqda “RBK” xabar bermoqda.
“Ko‘chalarda va turar joy sektorida noqonuniy migrantlar bo‘lmasligi kerak. Ishini yo‘qotganlar, OTMdan haydalganlar, daktiloskopiyadan o‘tmaganlar, til o‘rganmayotganlar, Rossiya jamiyatiga foyda keltirmayotganlar mamlakatimizni tark etishi kerak”, degan Rossiya ichki ishlar vaziri Vladimir Kolokoltsev.
IIV rahbari migrantlar o‘rtasidagi jinoyatchilikka qarshi tizimli kurashishga chaqirdi va ko‘rilgan choralarni “aybdorlar uchun jazo muqarrarligini ta’kidlagan holda” yoritish kerakligini aytdi.
Vazir migratsiya bo‘limlaridagi navbatlarga barham berish uchinchi zarur chora ekanligini ta’kidladi. “Hujjatlarni qabul qilish va rasmiylashtirishni o‘z vaqtida, ajiotajsiz amalga oshirilishi kerak”, degan Vladimir Kolokoltsev.
May oyining oxirlarida deputat Yaroslav Nilov Rossiyada migrantlar nomiga bittadan ortiq SIM-kartani rasmiylashtirishni taqiqlashni taklif etgandi. Rossiya maktablarida o‘qish uchun rus tili imtihonidan uch marta o‘ta olmagan migrantlarning farzandlarini vataniga qaytarib yuborishni ham taklif qilgandi. Migrant ayollar uchun bepul tug‘uruqni taqiqlash ham taklif qilingan.
Bundan bir necha kun avval Moskvadagi reydda Rossiya huquqni muhofaza qiluvchi organlari (OMON) tomonidan ushbu davlatda vaqtincha mehnat faoliyatini olib borayotgan xorij fuqarolariga nisbatan jismoniy kuch qo‘llanilgani muhokamalarga sabab bo‘lgandi. O‘zbekiston Rossiya TIVdan ushbu holatga izoh berish hamda kuchishlatar tashkilot vakillarining harakatlariga huquqiy baho berishni so‘rab nota yubordi. Rossiya TIV axborot xizmati rahbari Mariya Zaxarova ushbu notadagi ma’lumotlar diqqat bilan o‘rganilayotganini ma’lum qildi.
Izoh (0)