Toshkentda IIB xodimini pichoqlagan shaxsni ushlashda yordam bergan fuqaro 10 million so‘m bilan taqdirlandi. Bu haqda poytaxt IIBB matbuot xizmati xabar berdi.
19-may kuni Yunusobod dehqon bozorida xizmat olib borayotgan PPX inspektori safdor Izzatbek Ibragimov shubhali tutgan fuqaroni to‘xtatib tekshirmochi bo‘lganida, u yonidagi o‘tkir tig‘li buyum bilan xodimning hayotiga suiqasd qilib, bo‘yin qismiga tan jarohati yetkazgandi.
Jinoyatchi voqea joyidan yashirinish maqsadida shu atrofda bo‘lgan avtobusga qo‘lidagi pichoq bilan chiqib olgan. Hududda xizmat olib borayotgan patrul-post xizmati xodimlari — katta serjant Samat Karjanbayev, safdor Sardor Abzalov va profilaktika inspektori leytenant O‘ktam Normamatov tezkorlik bilan fuqarolar xavfsizligini taʼminlab, avtobusdan yo‘lovchilarni evakuatsiya qilgan. So‘ng xavfli jinoyatchini maxsus vositalar va jismoniy kuch ishlatish yo‘li bilan zararsizlantirib qo‘lga olgan.
Ushbu jarayonda IIO xodimlariga fuqaro Vladimir Avdiyans ham faol yordam bergan.
Mazkur holat Ichki ishlar vazirligi tomonidan alohida eʼtirof etildi. Toshkent shahar IIBBda tantanali ravishda bo‘lib o‘tgan tadbirda fuqaroga “Ichki ishlar vazirligining minnatdorchiligi” eʼlon qilinib, 10 million so‘m miqorida pul mukofoti bilan taqdirlandi.
Ichki ishlar vazirining tegishli buyrug‘iga asosan serjant S.Karjanbayev, safdor S.Abzalov “Aʼlo xizmatlari uchun” ko‘krak nishoni bilan, leytenant O‘.Normamatov rag‘batlantirish tariqasida muddatdan oldin katta leytenant maxsus unvoni bilan taqdirlandi.
Izoh (0)