Interpol qidiruviga berilgan shaxs Misrdan O‘zbekistonga ekstraditsiya qilindi

Interpolning O‘zbekistondagi Milliy markaziy byurosi xodimlari tomonidan ilk bor Misrdan diniy ekstremistik tashkilotlarda ishtirok etgani uchun xalqaro qidiruvda bo‘lgan jinoyatchi ekstraditsiya qilindi. Bu haqda byuro matbuot xizmati xabar berdi.

Qayd etilishicha, Interpolning Toshkent va Qohiradagi Milliy markaziy byurolarining muvofiqlashtiruvchi chorasi natijasida, Interpol bosh kotibiyati tomonidan o‘tkazilayotgan xalqaro uchrashuvlar doirasida byurolar rahbarlari o‘rtasida rivojlangan ikki tomonlama aloqalar hamda Interpolning bevosita yordami tufayli Misr politsiyasi, jinoyatchining O‘zbekistonga ekstraditsiya qilinishi birinchi marta amalga oshirilgan.

Mazkur shaxs islom universitetida tahsil olish maqsadida Misrga borgan va yashirin yig‘ilishlarda qatnasha boshlagan, keyinchalik esa diniy ekstremistik oqimga aʼzo bo‘lgan. U yerda o‘z tarafdorlarini ko‘paytirish maqsadida fundamentalizm g‘oyalarini targ‘ib etib, islom diniga qiziquvchi va Qohiraga o‘qish uchun kelganlar orasida targ‘ibot ishlarini olib borgan. Shu bois unga nisbatan ayb eʼlon qilinib, xalqaro qidiruvga berildi.

Kelib tushgan maʼlumotlarga ko‘ra, jinoyatchi Misrda yashiringan va tezkor-qidiruv tadbirlari davomida qo‘lga olingan. Interpolning Toshkent va Qohiradagi Milliy markaziy byurolarining hamkorlikdagi harakatlari bilan jinoyatchi Misrdan O‘zbekistonga ekstraditsiya qilingan.

Ekstraditsiya holatlari

2023-yilning mart o‘rtalarida Latviyada o‘zini elchixona xodimi sifatida tanishtirib, odamlarni chuv tushirib yurgan O‘zbekiston fuqarosi ekstraditsiya qilingani to‘g‘risida xabar berilgandi. Shuningdek, mart oxirlarida Interpolning O‘zbekistondagi Milliy markaziy byurosi xodimlari tomonidan xalqaro qidiruvda bo‘lgan shaxsni ekstraditsiya qilish Shvetsiyadan birinchi marta amalga oshirildi.

Aprel boshida Moskva shahrida 13 yil oldin O‘zbekistonda sodir etgan jinoyati uchun xalqaro qidiruvda bo‘lgan shaxs qo‘lga olingandi. Oy o‘rtalarida bo‘lsa, Qirg‘izistonda terrorchilik tashkilotiga a’zolikda gumonlanib, ikki o‘zbekistonlik hibsga olingan edi.