Interpolning O‘zbekistondagi Milliy markaziy byurosi xodimlari tomonidan xalqaro qidiruvda bo‘lgan shaxsni ekstraditsiya qilish Shvetsiyadan birinchi marta amalga oshirildi. Bu haqda byuro matbuot xizmati xabar berdi.
Qayd etilishicha, Toshkent va Stokgolm Interpol Milliy Markaziy byurolarining hamkorlikdagi harakatlari hamda Lion shahrida o‘tkazilgan Milliy markaziy byuro rahbarlarining yillik konferensiya davomidagi uchrashuvlari natijasida jinoyatchi birinchi marta Shvetsiyadan O‘zbekistonga ekstraditsiya qilingan.
Qidiruvdagi shaxs noqonuniy boyish maqsadida sheriklari bilan til biriktirib, puxta o‘ylangan reja asosida, tegishli hujjatlarni qalbakilashtirish orqali ko‘chmas mulkni sotish bilan shug‘ullangan va o‘zining ushbu firibgarlik harakatlari orqali katta moddiy zarar yetkazgan.
Olingan maʼlumotlarga ko‘ra, jinoyatchi Yevropa Ittifoqi mamlakatlari hududida yashiringan, ammo tezkor-qidiruv tadbirlari davomida qidiruvdagi shaxs Shvetsiya hududida aniqlangan va hibsga olingan.
“O‘zbekiston Bosh prokuraturasining ekstraditsiya to‘g‘risidagi iltimosnomasi qanoatlantirilganidan so‘ng jinoyatchi Interpol MMB xodimlari hamrohligida adolat qaror topishi uchun O‘zbekistonga olib kelindi”, — deyiladi xabarda.
Avvalroq Latviyada o‘zini elchixona xodimi sifatida tanishtirib, odamlarni chuv tushirib yurgan O‘zbekiston fuqarosini ekstraditsiya qilingani to‘g‘risida xabar berilgandi.
Izoh (0)