Interpolning O‘zbekistondagi Milliy markaziy byurosi xodimlari tomonidan firibgarlik sodir etgani uchun xalqaro qidiruvda bo‘lgan jinoyatchi ekstraditsiya qilindi. Bu haqda byuro matbuot xizmati xabar berdi.
Qayd etilishicha, Toshkent va Rigada faoliyat yurituvchi Interpol MMBlarning hamkorlikdagi saʼy-harakatlari tufayli, ikki davlat mazkur tashkilotlarining rahbarlari o‘rtasidagi muzokaralar natijasida firibgarlikda ayblanayotgan xalqaro qidiruvdagi jinoyatchi O‘zbekistonga berilgan.
Qidiruvdagi shaxs bir necha yillar davomida AQSHga chiqib ketishni rejalashtirgan fuqarolarga o‘zini AQSHning Toshkentdagi elchixonasi xodimi sifatida tanishtirib, ularga hujjatlarni rasmiylashtirish, xorijga chiqishga ruxsat olishda o‘z xizmatlarini taklif qilib kelgan.
“Jinoyatchini qo‘lga olish oson bo‘lmadi, chunki u O‘zbekistondan chiqib ketganidan keyin shaxsiy maʼlumotlarini o‘zgartirib, xorijiy davlatning soxta pasportidan foydalangan holda, jinoiy faoliyatini davom ettirib, o‘zini hamon elchixona xodimi sifatida tanishtirib, barcha xizmatlarni ko‘rsatib, firibgarlik yo‘li bilan jabrlanuvchilarning pul mablag‘larini o‘zlashtirib olgan”, — deyialdi xabarda.
Biroq qidiruvda bo‘lgan shaxsni aniqlash bo‘yicha uzoq davom etgan jarayonga qaramay, uning chet el pasportini soxta, shaxsiy maʼlumotlarini esa haqiqiy emas deb topib, Toshkent va Riga Intnerpolning MMB birgalikdagi saʼy-harakatlari natijasida huquqbuzarning shaxsi aniqlanib, qo‘lga olingan.
O‘zbekiston Bosh prokuraturasining ekstraditsiya to‘g‘risidagi iltimosnomasi qanoatlantirilgandan so‘ng, jinoyatchi Interpol MMB xodimlari hamkorligida adolat qaror topishi uchun O‘zbekistonga olib kelingan.
Izoh (0)