Beta Technologies kompaniyasi tomonidan ishlab chiqarilgan ushbu samolyot birinchi marta Jon F. Kennedi nomidagi xalqaro aeroportidan uchib chiqdi va namoyish parvozidan so‘ng qo‘ndi. Parvoz paytida samolyotda uchuvchi va to‘rt nafar yo‘lovchi bo‘lgan. Maʼlumotlarga ko‘ra, 45 daqiqalik parvoz uchun energiya sarfi atigi 7 dollarni tashkil etgan.
Beta Technologies kompaniyasi direktori Rob Vizental ushbu yangilikni shunday sharhladi: “Long-Aylenddan Nyu Yorkka elektr samolyotidagi bu parvoz zararli moddalar chiqarmagan holda shovqinsiz uchish tez orada haqiqatga aylanishini va foyda keltirishini ko‘rsatmoqda. Men kompaniyamizning elektrosamolyotlarga sodiqligini namoyish qilish uchun ushbu reysda yo‘lovchi bo‘lishdan ko‘ra yaxshiroq yo‘l topa olmadim”, dedi Rob Vizental.
Taʼkidlanganidek, bu ishlanma jamoat transporti tizimida uglerodni kamaytirish bo‘yicha kompleks saʼy-harakatlarning bir qismidir. Beta Technologiesʼning xabar berishicha, Nyu Yorkka muvaffaqiyatli qo‘nish olti yillik qatʼiy sinovlar va ishlanmalarning cho‘qqisi bo‘ldi. Beta Technologies asoschisi va bosh direktori Kayl Klarkning taʼkidlashicha, elektrosamolyot shaharlarda dolzarb bo‘lib, yo‘llardagi tirbandlik va chiqindilarni kamaytiradi, shuningdek, foydalanish imkoniyatini oshiradi.
O‘tgan yilning kuzida kompaniya o‘z samolyotlarini ishlab chiqarish va sertifikatlashni moliyalashtirish uchun 318 million dollar jalb qildi. Hozirga kelib Beta Technologies tomonidan jalb qilingan mablag‘larning umumiy hajmi 1 milliard dollardan oshdi.
Izoh (0)