O‘zbekiston Madaniyat va san’atni rivojlantirish jamg‘armasi xonanda Jennifer Lopesning konsertiga chiptalar 5-iyundan boshlab sotuvga chiqishini e’lon qildi.
Dunyo miqyosidagi yulduzning konserti 2025-yil 7-avgust kuni “Milliy” stadionda bo‘lib o‘tadi. Tadbir san’atkornining Up All Night: Live in 2025 jahon gastroli doirasida tashkil etiladi.
Bu Jennifer Lopesning O‘zbekistondagi ilk chiqishi bo‘ladi. Tomoshabinlarni ulkan sahna shousi, jonli ijrodagi mashhur hitlar, professional xoreografiya va unutilmas muhit kutmoqda.
Chiptalar narxi 1 040 000 so‘mdan 4 100 000 so‘mgacha belgilangan.
Tik turiladigan zonalar:
- VIP Standing (sahna oldidagi olovrang zona) — 3 770 000 so‘m
- Fanzone (sahna yaqinidagi ko‘k zona) — 3 510 000 so‘m
- Dance Floor (sahna oldidagi yashil zona) — 2 990 000 so‘m
O‘rindiqli joylar (tribunalar):
- Eng arzon chiptalar — 1 040 000 so‘m (to‘q feruza rang zona, stadionning qarama-qarshi tomonidagi yuqori qatorlar)
- O‘rtacha narxdagi joylar — 1 560 000 so‘mdan 2 990 000 so‘mgacha (sahnaga yaqin yoki yaxshi ko‘rinishga ega bo‘lgan sektorlarda)
- Eng qimmat o‘rindiqlar — 4 100 000 so‘m (binafsha zona, sahnaga yaqin joylar)
Jennifer Lopesning o‘nlab mamlakatlarni qamrab oladigan Up All Night: Live in 2025 katta konsert turi AQSH, Yevropa, Osiyo, jumladan, Qozog‘iston, Armaniston va O‘zbekistonda bo‘lib o‘tadi.
Ma’lumot uchun: Jennifer Lopes 1969-yil 24-iyul Nyu York shahrida dunyoga kelgan amerikalik aktrisa, qo‘shiqchi, raqqosa, modelyer, prodyuser va ishbilarmon ayol. U birinchi marta 1991-yilda In Living Color teleko‘rsatuvida Fly Girl raqqosasi sifatida shuhrat qozongan. U 1993-yilgacha to‘liq aktyorlik faoliyatini boshlashga qaror qilgunga qadar jamoaning doimiy aʼzosi bo‘lib qoldi. Lopes o‘zining birinchi bosh rolini 1997-yilda qo‘shiqchi Selena haqidagi biografik filmda ijro etgan. Bu rol unga “Oltin globus” nominatsiyasini olib kelgan.
Izoh (0)