Afsuski, haqiqiy hayotda mashhur joylar suratdagidek qiziqarli va xushmanzara bo‘lmaydi. Shu sababli mashhur sayyohlik maskanlari aslida qanday ko‘rinishga ega ekanligini bilib oling.
Pamukkale
Ko‘plab sayyohlar Pamukkaledan hafsalasi pir bo‘lib qaytadi — chunki ularning bu joy haqidagi tasavvurlari o‘ttiz yil oldingi fotosuratlar yoki ishlov berilgan rasmlarga asoslangan. Aslida ba’zi travertinlar (mineral suvli tabiiy hovuzlar) yillar davomida qurib qolgan.
Bundan tashqari, bu joy sayyohlar orasida juda mashhur bo‘lgani sababli kunduzi olomon bilan to‘ladi. Shunday bo‘lsa-da, Pamukkale ko‘rishga arziydi — faqat xuddi reklama suratlaridagidek manzarani kutmaslik kerak.
Hitachi milliy sohil parki
Bu bog‘da yil bo‘yi turli xil o‘simliklar gullasa-da, unga haqiqiy shuhratni nemofilalar keltirgan. Har bahor bu yerda 4,5 millionga yaqin ushbu mayda gullar ochiladi va maydonlar chinakam moviy dengizga aylanib, ko‘plab sayyohlarni o‘ziga jalb qiladi.
Shuni hisobga olish kerakki, park doim gavjum bo‘ladi, dam olish kunlarida esa umuman yurib bo‘lmaydi. Shu sababli qiziqarli suratlar olish uchun bu yerga erta tongda kelgan yoki bulutli kunni tanlagan ma’qul.
Stounhenj
Bu dunyodagi eng mashhur arxeologik yodgorliklardan biri hisoblanadi. Olimlar Stounhenjning qanday va nima maqsadda qurilgani haqida hanuzgacha bahs yuritmoqda. Fotosuratlarda yodgorlik odatda ulkan ko‘rinadi, go‘yo ulkan toshlarni qadimgi ulkan mavjudot joylashtirganday. Ammo aslida Stounhenj unchalik katta emas: doiraning diametri 33 metr, toshlarning balandligi esa 4,1 metrni tashkil etadi. Bundan tashqari, halqa ichiga faqat maxsus ekskursiya buyurtma qilgan sayohatchilar kira oladi. Qolgan sayyohlar esa monolitlarni faqat uzoqdan tomosha qilish imkoniyatiga ega.
Skougafos sharsharasi
Bu 60 metr balandlikdagi sharshara Islandiyaning eng mashhur sayyohlik joylaridan biri sanaladi. Shu bois bu yerda kameralar bilan kezib yurgan olomon ko‘pligiga hayron bo‘lmaslik kerak. Agar yolg‘iz o‘zingiz ko‘rishni istasangiz, sharsharaga ertaroq tashrif buyurganingiz ma’qul.
Bundan tashqari, sayohatchilarning aksariyati bu yerga ekskursiya guruhlari tarkibida tashrif buyurishadi, shu bois ularning vaqti cheklangan. Shuning uchun sharshara bo‘ylab so‘qmoqdan yuqoriga ko‘tarilishga ulgurishmaydi. Daryo oqimi bo‘ylab yuqoriroqda yana bir nechta manzarali sharsharalarni ko‘rish mumkin, buning ustiga, bu hududning o‘zi ham ancha kimsasiz.
Piza minorasi
Ko‘plab reklama suratlarini ko‘rib, Piza minorasini ulkan va shahar ustida osilib turgandek tasavvur qilish mumkin. Ammo aslida unday emas. Bu inshootning balandligi atigi 56 metr bo‘lib, haqiqatda u unchalik salobatli ko‘rinmaydi.
Troll tili
Norvegiyaning ushbu diqqatga sazovor joyiga yetib borish uchun sayohatchi dastlab manzarali, biroq uncha oson bo‘lmagan tog‘ yo‘nalishlaridan birini bosib o‘tishi lozim — ularning eng qisqasi 10 kilometrni tashkil etadi. Qiziqarli rasm olish uchun esa qoyaga chiqishga bir soatlik navbatda turish kerak bo‘ladi.
Gigantlar ko‘prigi
Ushbu tabiat yodgorligi Shimoliy Irlandiyada joylashgan. Suratlarda taxminan 50 million yil avval suvosti vulqoni otilishi natijasida hosil bo‘lgan bazalt ustunlari deyarli bir xil o‘lchamda ko‘rinadi. Aslida esa bu ustunlar balandligi jihatidan juda farq qiladi va dengiz tomon pasayib boruvchi zinapoyaga o‘xshaydi. Eng baland ustunlarning bo‘yi 12 metrga yetadi.
Tajribali sayohatchilar bu joyga sayyohlik markazi orqali tushishni maslahat bermaydi. Birinchidan, chipta sotib olishga to‘g‘ri keladi, ikkinchidan, bu tomondan Gigantlar ko‘prigi manzarasi unchalik chiroyli emas. Mashinani Portballintre shahrida yoki Danlyus qal’asi yonida qoldirib, qirg‘oq bo‘ylab sayr qilgan ma’qul. Bu yerdan butun sohil juda go‘zal ko‘rinadi, manzara esa kishini hayratga soladi.
Izoh (0)