Афсуски, ҳақиқий ҳаётда машҳур жойлар суратдагидек қизиқарли ва хушманзара бўлмайди. Шу сабабли машҳур сайёҳлик масканлари аслида қандай кўринишга эга эканлигини билиб олинг.
Памуккале
Кўплаб сайёҳлар Памуккаледан ҳафсаласи пир бўлиб қайтади — чунки уларнинг бу жой ҳақидаги тасаввурлари ўттиз йил олдинги фотосуратлар ёки ишлов берилган расмларга асосланган. Аслида баъзи травертинлар (минерал сувли табиий ҳовузлар) йиллар давомида қуриб қолган.
Бундан ташқари, бу жой сайёҳлар орасида жуда машҳур бўлгани сабабли кундузи оломон билан тўлади. Шундай бўлса-да, Памуккале кўришга арзийди — фақат худди реклама суратларидагидек манзарани кутмаслик керак.
Hitachi миллий соҳил парки
Бу боғда йил бўйи турли хил ўсимликлар гулласа-да, унга ҳақиқий шуҳратни немофилалар келтирган. Ҳар баҳор бу ерда 4,5 миллионга яқин ушбу майда гуллар очилади ва майдонлар чинакам мовий денгизга айланиб, кўплаб сайёҳларни ўзига жалб қилади.
Шуни ҳисобга олиш керакки, парк доим гавжум бўлади, дам олиш кунларида эса умуман юриб бўлмайди. Шу сабабли қизиқарли суратлар олиш учун бу ерга эрта тонгда келган ёки булутли кунни танлаган маъқул.
Стоунҳенж
Бу дунёдаги энг машҳур археологик ёдгорликлардан бири ҳисобланади. Олимлар Стоунҳенжнинг қандай ва нима мақсадда қурилгани ҳақида ҳанузгача баҳс юритмоқда. Фотосуратларда ёдгорлик одатда улкан кўринади, гўё улкан тошларни қадимги улкан мавжудот жойлаштиргандай. Аммо аслида Стоунҳенж унчалик катта эмас: доиранинг диаметри 33 метр, тошларнинг баландлиги эса 4,1 метрни ташкил этади. Бундан ташқари, ҳалқа ичига фақат махсус экскурсия буюртма қилган саёҳатчилар кира олади. Қолган сайёҳлар эса монолитларни фақат узоқдан томоша қилиш имкониятига эга.
Скоугафос шаршараси
Бу 60 метр баландликдаги шаршара Исландиянинг энг машҳур сайёҳлик жойларидан бири саналади. Шу боис бу ерда камералар билан кезиб юрган оломон кўплигига ҳайрон бўлмаслик керак. Агар ёлғиз ўзингиз кўришни истасангиз, шаршарага эртароқ ташриф буюрганингиз маъқул.
Бундан ташқари, саёҳатчиларнинг аксарияти бу ерга экскурсия гуруҳлари таркибида ташриф буюришади, шу боис уларнинг вақти чекланган. Шунинг учун шаршара бўйлаб сўқмоқдан юқорига кўтарилишга улгуришмайди. Дарё оқими бўйлаб юқорироқда яна бир нечта манзарали шаршараларни кўриш мумкин, бунинг устига, бу ҳудуднинг ўзи ҳам анча кимсасиз.
Пиза минораси
Кўплаб реклама суратларини кўриб, Пиза минорасини улкан ва шаҳар устида осилиб тургандек тасаввур қилиш мумкин. Аммо аслида ундай эмас. Бу иншоотнинг баландлиги атиги 56 метр бўлиб, ҳақиқатда у унчалик салобатли кўринмайди.
Тролл тили
Норвегиянинг ушбу диққатга сазовор жойига етиб бориш учун саёҳатчи дастлаб манзарали, бироқ унча осон бўлмаган тоғ йўналишларидан бирини босиб ўтиши лозим — уларнинг энг қисқаси 10 километрни ташкил этади. Қизиқарли расм олиш учун эса қояга чиқишга бир соатлик навбатда туриш керак бўлади.
Гигантлар кўприги
Ушбу табиат ёдгорлиги Шимолий Ирландияда жойлашган. Суратларда тахминан 50 миллион йил аввал сувости вулқони отилиши натижасида ҳосил бўлган базалт устунлари деярли бир хил ўлчамда кўринади. Аслида эса бу устунлар баландлиги жиҳатидан жуда фарқ қилади ва денгиз томон пасайиб борувчи зинапояга ўхшайди. Энг баланд устунларнинг бўйи 12 метрга етади.
Тажрибали саёҳатчилар бу жойга сайёҳлик маркази орқали тушишни маслаҳат бермайди. Биринчидан, чипта сотиб олишга тўғри келади, иккинчидан, бу томондан Гигантлар кўприги манзараси унчалик чиройли эмас. Машинани Портбаллинтре шаҳрида ёки Данлюс қалъаси ёнида қолдириб, қирғоқ бўйлаб сайр қилган маъқул. Бу ердан бутун соҳил жуда гўзал кўринади, манзара эса кишини ҳайратга солади.
Изоҳ (0)