2024/25-yilgi UEFA Chempionlar Ligasi finali doirasida bo‘lib o‘tgan “PSJ” — “Inter” uchrashuvi o‘z nihoyasiga yetdi. 31-may, shanba kuni Myunxendagi “Allianz Arena” stadionida o‘tkazilgan bahsda Parij jamoasi raqibini yirik – 5:0 hisobida mag‘lub etib, bosh sovringa ega chiqdi.
Uchrashuvda hisob erta ochildi. 12-daqiqada Ashraf Hakimi “PSJ”ni oldinga olib chiqqan bo‘lsa, oradan 8 daqiqa o‘tib Desir Due ikkinchi golni kiritdi — 2:0. Dastlabki bo‘lim aynan shu hisobda yakunlandi.
Ikkinchi taym teng kurashlar bilan boshlandi. Biroq Luis Enrike boshchiligidagi “PSJ” yana bir bor ustunligini ko‘rsatdi — 63-daqiqada Due o‘zining ikkinchi golini urdi. 73-daqiqada Xvicha Kvaratsxeliya to‘rtinchi gol muallifiga aylandi, 86-daqiqada esa Sennu Mayulu hisobni yirik 5:0 ko‘rinishiga keltirdi.
Shu tariqa, “PSJ” hal qiluvchi bahsda “Inter” ustidan yirik g‘alabaga erishib, UEFA Chempionlar Ligasining navbatdagi mavsumida chempionlikni qo‘lga kiritdi.
UEFA Chempionlar Ligasi
Final. “Allianz Arena”, Myunxen
31-may, shanba
“PSJ” — “Inter” 5:0
Gollar: 1:0 — Hakimi (12), 2:0 — Due (20), 3:0 — Due (63), 4:0 — Kvaratsxeliya (73), 5:0 — Mayulu (86).
Izoh (0)