O‘zbekistonda modulli mehmonxonalar qurish uchun ajratiladigan subsidiya miqdori oshirildi. Bu “2025–2026-yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida”gi prezident farmonida belgilandi.
Unga ko‘ra, 2027-yil 1-yanvargacha tadbirkorlar tomonidan modulli mehmonxonani qurish va jihozlash xarajatlarining bir qismini qoplash uchun kamida 10 ta moduldan iborat bo‘lgan modulli mehmonxonalar uchun quyidagi miqdorlarda 1 martalik subsidiya ajratiladi:
- I toifadagi modulli mehmonxonadagi har bir joy uchun — 10 mln so‘m;
- II toifadagi modulli mehmonxonadagi har bir joy uchun — 7 mln so‘m;
- III toifadagi modulli mehmonxonadagi har bir joy uchun — 5 mln so‘m.
Ilgari muvofiqlik sertifikati berilgan yangi tashkil etilgan hamda kamida 10 ta moduldan iborat bo‘lgan modulli mehmonxona uchun uning toifasidan qat’i nazar yaratilgan har bir joy uchun 2026-yil 1-noyabrgacha 1 mln so‘mdan subsidiya ajratilishi belgilangandi.
Prezidentning yangi farmoniga ko‘ra, 2028-yil 1-yanvargacha tibbiy turizm klasterlarining turizm yo‘nalishidagi xodimlari malakasini oshirish xarajatlarining bir qismi qoplab beriladi.
2030-yil 1-yanvargacha tibbiy turizm klasterlarining xizmatlari xalqaro turizm va tibbiyot yarmarkalari hamda ko‘rgazmalarida targ‘ib qilinadi. 2025-yil 1-iyundan turizm sohasiga oid barcha davlat elektron tizim va platformalari Milliy turizm yagona platformasi doirasida ishlab chiqiladi. 2025-yil yakuniga qadar Samarqand shahrida “Ipak yo‘lida turizm” tematik ofisi tashkil etiladi.
Farmonga ko‘ra, respublika miqyosida yoshlar o‘rtasida o‘tkaziladigan sport musobaqalari g‘oliblari qo‘shimcha ravishda “O‘zbekiston bo‘ylab sayohat” yo‘llanmasi bilan taqdirlanishi belgilandi.
Modulli mehmonxonalar haqida
Modulli mehmonxonalar xalqaro bozorda ancha vaqtdan beri ma’lum bo‘lgan mehmonxona turidir. Modulli mehmonxona — bu tayyor qurilish blok-konteynerlaridan yig‘ilgan bino-konstruktor hisoblanadi. Bu qurilishning zamonaviy va tezkor usuli. Bu poydevori bo‘lmagan qurilish loyihasi bo‘lib, karkas-modul texnologiyasidan foydalangan holda qurilgan, uni zarur bo‘lganda joyidan boshqa joyga ko‘chirish mumkin.
O‘zbekistonda 2024-yilda “Turizm xizmatlari. Modulli mehmonxonalar. Tasniflash tizimi” milliy standarti ishlab chiqilgan. Toifalar rim raqami bilan belgilanadi va uchta I, II, va III toifa bo‘yicha tasniflanadi. Eng yuqori toifa I (birinchi), eng past III (uchinchi) toifa hisoblanadi.
Izoh (0)