Turkiya rasmiylari mamlakat Janubiy Afrikaning Isroilga qarshi genotsid ishiga qo‘shilishini maʼlum qildi. Bu haqda Anadolu nashri xabar berdi.
Manbada aytilishicha, Turkiya hukumati Falastin masalasini hozirgi xalqaro tartibning barqarorligiga taʼsir qilishi mumkin bo‘lgan mavzu deb hisoblashini aytgan. Shu boisdan ham rasmiylar xalqaro sudda Janubiy Afrika bilan bitta pozitsiyada bo‘lishni maʼqul ko‘rgan.
“Muhtaram prezidentimiz tomonidan daʼvoga qo‘shilish to‘g‘risida qaror qabul qilingandan so‘ng, rasmiy arizamizni topshiramiz. Bugunga qadar qilganimiz kabi, insoniyat vijdoni va qonunlar nazarida qoralangan Isroilning munosib javob olishini taʼminlash uchun harakatlarimizni qatʼiyat bilan davom ettiramiz”, — degan Turkiya Buyuk Millat Majlisi Adliya qo‘mitasi raisi Juneyd Yuksel.
Turkiya rasmiysi, shuningdek, Anqara Falastin urushini xalqaro tartibning buzilishi hamda global halokatlarga olib keluvchi omil sifatida ko‘rishini bildirgan. Isroilning bosib olingan Falastin hududlarida olib borgan siyosatini esa aparteid deb atagan.
Turkiya rasmiylari Isroil 1948-yilgi Genotsid jinoyatining oldini olish va jazolash to‘g‘risidagi konvensiyani qo‘pol ravishda buzayotganini bildirgan. Ular, shuningdek, xalqaro huquq har qanday sharoitda istisno va imtiyozlarsiz hamma uchun teng qo‘llanishi kerakligini taʼkidlagan.
Turkiya Tashqi ishlar vazirligi rasmiylari Isroil tomonidan sodir etilgan genotsid, insoniyatga qarshi jinoyatlar va urush jinoyatlari fosh etilishini hamda zudlik bilan sud jarayoni boshlanishini kutayotganlarini bildirgan.
Mamlakat xorijiy idorasi rahbari Xoqon Fidan ham Indoneziya tashqi ishlar vaziri Retno Marsudi bilan matbuot anjumanida Turkiya Janubiy Afrikaning Isroilga qarshi genotsid ishiga qo‘shilishini rasman tasdiqlagan.
Izoh (0)