AQSH davlat kotibi Entoni Blinkenning Isroilni oqlash va HAMASni kelishuvni buzganlikda ayblashga urinishi uning mamlakatining G‘azo sektoridagi genotsidga sheriklik siyosatining davomi hisoblanadi. Bu haqda Falastinning HAMAS harakati ma’lum qildi.
Bayonotda taʼkidlanishicha, HAMAS taqdim etilgan o‘t ochishni to‘xtatish va mahbuslarni ozod qilish bo‘yicha kelishuvga erishish takliflarini ijobiy va masʼuliyat bilan ko‘rib chiqqan.
HAMASga ko‘ra, BMT Xavfsizlik kengashining qarori yuzasidan Isroil bosh vaziri Binyamin Netanyaxu va uning hukumati tomonidan hech qanday qoniqish belgisi kuzatilmagan.
Isroil G‘azoda AQSH prezidenti Jo Baydenning taklifiga zid ravishda doimiy o‘t ochishni to‘xtatishni rad etishda davom etmoqda, — deyiladi HAMAS bayonotida.
AQSHning otashkesim rejasi
31-may kuni AQSH prezidenti Jo Bayden uch bosqichdan iborat yangi tinchlik bitimi loyihasi shartlarini e’lon qildi. Birinchisi olti haftaga mo‘ljallangan bo‘lib, to‘liq o‘t ochishni to‘xtatish, Isroil qo‘shinlarini G‘azoning aholi punktlaridan olib chiqib ketish, yuzlab falastinlik mahbuslarni qamoqdan ozod qilish evaziga HAMAS tomonidan garovga olinganlarni ozod etishni nazarda tutadi.
Shuningdek, ushbu davrda tomonlar muzokaralarni boshlashlari kerak va o‘zaro kelishuvga erishilgunga qadar sulh o‘z kuchida qoladi. Ikkinchi bosqich barcha garovga olinganlarni, jumladan, harbiy xizmatchilarni ham ozod qilishni nazarda tutadi. Uchinchi bosqichda G‘azo sektorini tiklash va halok bo‘lgan isroilliklarning jasadlarini yaqinlariga topshirish ko‘zda tutilgan.
Izoh (0)