Prezident Shavkat Mirziyoyev Turkiy davlatlar tashkiloti norasmiy sammitida nutq so‘zladi. Bu haqda Prezident matbuot xizmati xabar berdi.
Davlat rahbari oldinda aniq vazifa turganini, yaqin yillarda o‘zaro savdo ulushini keskin ko‘paytirish lozimligini taʼkidladi. Shu maqsadda Turk-treyd onlayn platformasini yaratish va savdoni oshirish amaliy dasturini qabul qilish tashabbuslari ilgari surildi.
“Transkaspiy xalqaro yo‘lagi orqali yuk tashish hajmini oshirish va bojxona-chegara tartiblarini soddalashtirish uchun “yagona darcha” hamda “yashil koridorlar” tizimlarini tezroq yo‘lga qo‘yishga chaqiraman. Ushbu yo‘nalishdagi hamkorlikni kengaytirish maqsadida noyabr oyida Toshkentda Turkiy davlatlarning Xalqaro multimodal transport va logistika forumini o‘tkazishni rejalashtirganmiz”, dedi O‘zbekiston yetakchisi.
Shavkat Mirziyoyev Turkiy investitsiya jamg‘armasining faoliyati sarmoyalar oqimining faollashuviga turtki berishini aytdi.
“Biz innovatsion loyihalarni rag‘batlantirish uchun qo‘shma venchur kompaniyasini tashkil etish zarur, deb hisoblaymiz. Bu borada mamlakatlarimizning investitsiya imkoniyatlarini to‘liq aks ettirgan ‘Yagona investitsiya portali’ni joriy etish maqsadga muvofiqdir”, deydi prezident.
O‘zbekiston yetakchisi sanoat kooperatsiyasi sohasida amaliy hamkorlikni yangi bosqichga ko‘tarish vaqti kelganini ham bildirdi.
“Bu borada kimyo, energetika, tog‘-kon, yengil sanoat, farmatsevtika, charm-poyabzal, oziq-ovqat va qurilish sohalarida salmoqli ishlab chiqarish quvvatlarini yaratish bo‘yicha Sanoat kooperatsiyasi dasturini ishlab chiqishni taklif etaman”, deya qo‘shimcha qildi Shavkat Mirziyoyev.
Izoh (0)