Vengriyaga rasmiy tashrifning ishbilarmonlik dasturi doirasida Shavkat Mirziyoyev OTP Bank Group direktorlar kengashi raisi Shandor Chani bilan uchrashuv o‘tkazdi. Bu haqda Prezident matbuot xizmati xabar berdi.
Unda bankning mamlakat bank-moliya bozoridagi faoliyati 2023-yildan buyon jadal rivojlanib borayotgani qayd etilgan. Davlat rahbari avtokreditlashni rivojlantirish va biznes loyihalarini moliyalashtirishga doir qo‘shma dasturlarni olqishladi.
Parrandachilik klasterini tashkil etish bo‘yicha yirik loyihani tez fursatda amalga oshirish muhimligi qayd etildi. Toshkent viloyatidagi sanoat parkida Vengriya kompaniyalari loyihalarini ilgari surish va qo‘llab-quvvatlash ustuvor yo‘nalish sifatida qayd etildi.
Shavkat Mirziyoyevning Budapeshtga rasmiy tashrifi Vengriyaning yirik kompaniya va banklari rahbarlari bilan uchrashuvdan boshlandi.
Shavkat Mirziyoyevning Vengriyaga tashrifi
Shavkat Mirziyoyev Vengriya bosh vaziri Viktor Orbanning taklifiga binoan 2025-yil 19-may kuni rasmiy tashrif bilan ushbu mamlakatga rafiqasi bilan birga yetib bordi. Samolyot oldida O‘zbekiston yetakchisini Vengriya iqtisodiy rivojlanish vaziri Marton Nad va boshqa rasmiy shaxslar kutib oldi.
Tashrif doirasida Budapesht shahrida oliy darajadagi muzokaralar, Vengriyaning rasmiylari va yetakchi kompaniyalari rahbarlari bilan uchrashuvlar o‘tkazilishi ko‘zda tutilgan. Kun tartibidan mamlakatlar o‘rtasidagi amaliy hamkorlik va strategik sheriklikni yanada kengaytirishning dolzarb masalalari o‘rin olgan.
O‘zbekiston yetakchisi 21-may kuni Turkiy davlatlar tashkiloti norasmiy sammitida ham ishtirok etadi.
Shavkat Mirziyoyevning Vengriyaga undan avvalgi davlat tashrifi 2022-yil 3–4-oktyabr kunlari bo‘lib o‘tgan. Bu tashrif davomida davlat rahbari Vengriya bosh vaziri Viktor Orban bilan uchrashib, ikki tomonlama hamkorlikni rivojlantirish masalalarini muhokama qilgan. Tashrif yakunida O‘zbekiston va Vengriya o‘rtasida strategik sheriklikni mustahkamlashga qaratilgan 15 ta hujjat imzolangan. 2023-yil avgustida esa ushbu davlatga amaliy tashrif bilan borgandi. Unda Viktor Orban bilan uchrashuv o‘tkazib, O‘zbekiston bilan Vengriya o‘rtasidagi strategik sheriklikni yanada mustahkamlash va ko‘p qirrali hamkorlikni kengaytirish masalalarini muhokama qildi.Yetakchilar Budapesht shahrida yengil atletika bo‘yicha jahon chempionatining erkaklar o‘rtasida 100 metr masofaga yugurish bo‘yicha final bahsini tomosha qildi.
Izoh (0)