Toshkentdagi go‘zallik salonida ayolning yuzi 80 foiz kuydirib qo‘yildi. Bu haqda Raqobat qo‘mitasi xabar berdi.
Qayd etilishicha, Raqobat qo‘mitasiga fuqaro tomonidan go‘zallik salonlaridan birida amalga oshirilgan “sariq piling” muolajasi natijasida yuz terisining taxminan 80 foizi kuchli kimyoviy kuyishga uchragani haqida murojaat kelib tushdi. Mijoz ko‘rgan salbiy oqibatlar og‘ir davolanish jarayoni hamda sezilarli moliyaviy xarajatlar bilan kechgan.
Qo‘mita tomonidan olib borilgan o‘rganish va tahlil ishlari davomida bir qator qonunbuzilish holatlari aniqlangan. Jumladan:
- Muassasa tomonidan tibbiy litsenziya talab etiladigan kosmetologik xizmatlar hech qanday tegishli ruxsatnomasiz ko‘rsatilgan;
- Piling xizmatini ko‘rsatgan xodimning oliy tibbiy ma’lumotga ega ekani tasdiqlanmagan;
- Amalga oshirilgan muolajalar belgilangan sifat va xavfsizlik standartlariga javob bermagani aniqlangan.
Mazkur holatda Jinoyat kodeksining 190-moddasi (litsenziya yoki boshqa ruxsatnoma talab qilinadigan faoliyatni tegishli hujjatlarsiz amalga oshirish) alomatlari mavjudligi inobatga olinib, Raqobat qo‘mitasi tomonidan to‘plangan hujjatlar belgilangan tartibda huquqiy baho berilishi uchun Bosh prokuraturaga yuborildi.
Raqobat qo‘mitasi jamoatchilikka yana bir bor eslatdi: tibbiy litsenziyasiz amalga oshirilayotgan tibbiy xizmatlar, xususan kimyoviy piling kabi murakkab kosmetologik muolajalar nafaqat qonunbuzarlik, balki iste’molchilarning sog‘lig‘i va xavfsizligiga befarq munosabat sifatida baholanadi.
Fuqarolarga kosmetologik va tibbiy xizmatlardan foydalanishda hushyorlik va ehtiyotkorlikni, shuningdek xizmat ko‘rsatuvchi subyektlarning litsenziyasi va mutaxassislarning malakasiga alohida e’tibor qaratish tavsiya etildi.
Toshkentdagi xususiy klinikada reklama evaziga liposaksiya qildirgan bloger Komila Abduqodirovada operatsiyadan so‘ng nekroz yuzaga kelgani haqida xabar berilgan edi.
Izoh (0)