Go‘zallik uchun qancha pul sarflamang, xarajatlaringizni yulduzlarning tashqi ko‘rinishiga ketkizgan mablag‘lari bilan taqqoslab bo‘lmaydi. Ular har doim omma e’tiborida, shuning uchun ular go‘zallik protseduralarini e’tiborsiz qoldirolmaydi. Bugun mashhurlar chiroyli ko‘rinish uchun oyiga qancha pul sarflashi haqida ma’lumot beramiz.
Kim Kardashyan
Ushbu ro‘yxatning norasmiy malikasi Kim Kardashyandir. U go‘zallik uchun juda ko‘p vaqt va pul sarflaydigan yulduzlardan biridir. Uning 364 million obunachilarining deyarli barchasi u salonlarda oyiga kamida 180 soat o‘tkazishini biladi — bu 7 kundan ortiq degani. Bir oyda u o‘zi uchun taxminan 130 ming dollar sarflaydi. Albatta, bu pulning katta qismi mashhurning shaxsiy murabbiyi Melissa Alkantaraga ketadi, u har kuni ertalab yulduz bilan haftada olti marta ikki soatdan ishlaydi.
Shuningdek, Kim Beverli Hillsdagi Beyli saloniga tashrif buyurish uchun har ikki haftada 800 dollar to‘laydi. Haftada ikki marta glikolik kislota bilan yuzni yoshartiruvchi piling protsedurasidan o‘tadi va oyiga bir marta oltin terapiyasini oladi. Lazer bilan davolash Kimga teri rangini saqlab qolishga yordam beradi — bu muolaja narxi 2000 dollarni tashkil etadi.
Har 10 kunda bir marta yulduz kiprik ektirish, qoshlar, manikyur, pedikyur va boshqa go‘zallik muolajalarini oladi — bularga oyiga taxminan 5 ming dollar ketadi va bu plastik jarrohlikni o‘z ichiga olmaydi.
U oyiga ikki kunni spa muolajalariga bag‘ishlaydi. Har uch haftada 14 000 dollar soch parvarishiga, 1 285 dollar 24 karatli oltin niqoblarga va yana 10 000 dollar lazer bilan davolashga ketadi. Kardashyan vizajistlari (Mario Dedivanovich va Ariel Tejada) hamda sartaroshlari (Kris Appleton va Endryu Fits Simons) jamoasiga 2 dan 2,5 ming dollargacha to‘laydi.
Rianna
Riannaning asosiy go‘zallik xarajatlari sochlariga to‘g‘ri keladi. Xonanda eng ko‘p pulni soch turmagi, soch rangini o‘zgartirish va parvarish qilishga sarflaydi. U sartaroshiga haftasiga 16 ming dollar to‘laydi.
Kosmetologiyaga oyiga yana 50 ming dollar ketadi. Yulduz asosan tozalash va pilingdan foydalanadi, ba‘zida lifting protseduralarini ham oladi, lekin u kislorodli niqoblar va lazer terapiyasini yaxshi ko‘radi. Haftada ikki marta Riannaning uyiga maxsus mutaxassis kelib, xonandaning yuzi va tanasiga mukammal zagar beradi. Bitta protseduraning narxi 800 dollarni tashkil qiladi.
Enn Xeteuey
Sochlariga alohida e’tibor beradigan yana bir yulduz — Enn Xeteuey. Aktrisa tabiiy go‘zalligi bilan mashhur, ammo chiroyli soch katta pul talab qiladi.
Aktrisaning stilisti Ted Gibson. Uning birgina muolajasi 950 dollar turadi, uyga tashrif esa undan ham qimmatroq. Xeteuey ko‘p yillar davomida sevimli stilistiga sodiq. Bundan tashqari, kosmetologi Su Manning tavsiyasiga ko‘ra, u har kuni yuz massaji oladi.
Aktrisa go‘zalligining yana bir komponenti — SPF krem. Bunday mahsulotlar Enning yoshligi va chinnidek terisini saqlab qolishning kalitidir.
Keyt Middlton
Keyt Middltonning tabiiy go‘zalligiga qarab, serjilo sochlar va mukammal teri genetika natijasiga o‘xshaydi. Vaholanki, xorijlik jurnalistlar Uels malikasi shaxsiy parvarishi uchun oyiga 6 ming dollar sarflayotganini aniqlagan.
Kosmetik brendlar orasida Middlton hashamatli narsalarni afzal ko‘radi. Keytning manikyur va pedikyuri ancha arzon – oyiga 600 dollargacha. Shahzoda Uilyam rafiqasining teri rangi ham professionallar mehnati natijasidir. Bunga oyiga ikki marta 118 dollar sarflanadi. Ro‘yxatda stomatologik klinikaga tashrif ham bor. Shuningdek, Keyt uchun London klinikasida har hafta ari zahridan 350 dollarlik niqob tayyorlanadi.
Jennifer Lopes
Yulduzning yorqin terisi kosmetologga muntazam tashrif buyurish natijasidir. Jey Lo sevimli muolajasidan pul ayamaydi, uning asosiy tarkibiy qismi platsentadir. Uning tarkibida terining tiklanishiga yordam beradigan vitaminlar va oqsillar mavjud. Yulduz bunga haftasiga 1200 dollar sarflaydi. Yana 3500 dollar boshqa go‘zallik xizmatlariga sarflanadi. U makiyaj, soch turmagi, soch bo‘yash, manikyur, pedikyur va massaj uchun taxminan 15 ming to‘laydi. Jennifer ko‘p vaqtini mashg‘ulotlar va sport zalida o‘tkazishi ham sir emas. U yerda u jismoniy faoliyatning yangi turlarini sinab ko‘radi — yogadan tortib boksgacha.
Viktoriya Bekhem
Viktoriya Bekhem ham platsentaning muxlisi. To‘rt farzandning onasi platsenta yuz niqoblariga taxminan 650 dollar sarflaydi. Terining radikal shikastlanishining oldini olishga yordam beradigan mo‘jizaviy ingrediyent to‘g‘ridan to‘g‘ri Yangi Zelandiyadan olib kelinadi.
Dizayner, shuningdek, uzoq vaqt davomida muammoli teri bilan kurashmoqda. Viki haftada bir marta kosmetologga tashrif buyuradi va har bir tashrif uchun taxminan 15 ming dollar sarflaydi. Har olti oyda u og‘riqli, ammo juda samarali Morpheus 8 protsedurasiga boradi — go‘zallik sanoatida bu muolaja “Apparat kosmetologiyasi olamidagi Lamborjini” deb nomlanadi.
Ammo uning go‘zallik tartibida yoqimli daqiqalar ham bor — niqoblar, kremlar, gellar, zardoblar va ko‘piklar. Bekhem xonim bularning barchasini har kuni ishlatadi, shuning uchun mahsulotlarni tez-tez yangilab turish kerak. U buning uchun oyiga 5 ming dollar to‘laydi, sochlar parvarishi esa oyiga ikki ming dollarga tushadi. Avtozagar — haftasiga 300 dollar, ko‘chaga chiqish uchun makiyaj va soch turmagi — 2500 dollar, manikyur va pedikyur — oyiga 1000 dollar atrofida.
Madonna
Ko‘plab plastik operatsiyalarga qaramay, Madonna ham go‘zallik uchun oyiga juda ko‘p pul sarflaydi. Bir necha yil oldin xonanda qariyb 100 ming dollarga sellyulitni yo‘q qiladigan apparat sotib olgandi. Qurilma akustik to‘lqin terapiyasi yordamida ortiqcha yog‘dan xalos qiladi. Bundan tashqari, uyida 15 000 dollarlik terini kislorod bilan ta’minlash apparati ham bor.
Insayderlarning so‘zlariga ko‘ra, mashhurning yonida har doim vizajist va kosmetolog bo‘ladi, ular xonanda bo‘sh qoldi deguncha uning yuziga boshqa zardob yoki niqob surtadi, shuningdek, makiyajini yangilaydi. Afsonaviy qo‘shiqchining manikyuri va sochlari ham doimiy ravishda yangilab turiladi.
Izoh (0)