Тошкентдаги гўзаллик салонида аёлнинг юзи 80 фоиз куйдириб қўйилди. Бу ҳақда Рақобат қўмитаси хабар берди.
Қайд этилишича, Рақобат қўмитасига фуқаро томонидан гўзаллик салонларидан бирида амалга оширилган “сариқ пилинг” муолажаси натижасида юз терисининг тахминан 80 фоизи кучли кимёвий куйишга учрагани ҳақида мурожаат келиб тушди. Мижоз кўрган салбий оқибатлар оғир даволаниш жараёни ҳамда сезиларли молиявий харажатлар билан кечган.
Қўмита томонидан олиб борилган ўрганиш ва таҳлил ишлари давомида бир қатор қонунбузилиш ҳолатлари аниқланган. Жумладан:
- Муассаса томонидан тиббий лицензия талаб этиладиган косметологик хизматлар ҳеч қандай тегишли рухсатномасиз кўрсатилган;
- Пилинг хизматини кўрсатган ходимнинг олий тиббий маълумотга эга экани тасдиқланмаган;
- Амалга оширилган муолажалар белгиланган сифат ва хавфсизлик стандартларига жавоб бермагани аниқланган.
Мазкур ҳолатда Жиноят кодексининг 190-моддаси (лицензия ёки бошқа рухсатнома талаб қилинадиган фаолиятни тегишли ҳужжатларсиз амалга ошириш) аломатлари мавжудлиги инобатга олиниб, Рақобат қўмитаси томонидан тўпланган ҳужжатлар белгиланган тартибда ҳуқуқий баҳо берилиши учун Бош прокуратурага юборилди.
Рақобат қўмитаси жамоатчиликка яна бир бор эслатди: тиббий лицензиясиз амалга оширилаётган тиббий хизматлар, хусусан кимёвий пилинг каби мураккаб косметологик муолажалар нафақат қонунбузарлик, балки истеъмолчиларнинг соғлиғи ва хавфсизлигига бефарқ муносабат сифатида баҳоланади.
Фуқароларга косметологик ва тиббий хизматлардан фойдаланишда ҳушёрлик ва эҳтиёткорликни, шунингдек хизмат кўрсатувчи субъектларнинг лицензияси ва мутахассисларнинг малакасига алоҳида эътибор қаратиш тавсия этилди.
Тошкентдаги хусусий клиникада реклама эвазига липосакция қилдирган блогер Комила Абдуқодировада операциядан сўнг некроз юзага келгани ҳақида хабар берилган эди.
Изоҳ (0)