Saudiya Arabistonining “An-Nassr” klubi va Portugaliya terma jamoasi hujumchisi Krishtianu Ronaldu Angliyada kosmetik xizmatlar uchun to‘lovlarni amalga oshirmagani uchun sudga berildi. Bu haqda The Sun xabar bermoqda.
Kosmetolog Roshan Ravindranning ta’kidlashicha, portugaliyalik futbolchi 2021 va 2022-yillarda “Manchester Yunayted”da o‘ynagan vaqtida olgan muolajalari uchun pul to‘lamagan. Gap 40 ming funt sterling miqdoridagi summa haqida ketmoqda. Mutaxassis botoks, filler, terini parvarish qilish va qosh ko‘tarish bo‘yicha faoliyat olib boradi.
Da’voda aytilishicha, u Cheshir klinikasida Ronaldu va uning oila a’zolari uchun ishlagan.
Manchester va Londonda klinika filiallarini boshqaradigan doktor Roshdan izoh so‘ralganida: “Bu erda huquqiy masala davom etmoqda va men professional sifatida bemorlarimni muhokama qilmayman”, deya javob bergan.
Joriy mavsumda Ronaldu klub safida barcha turnirlarda 14 ta o‘yin o‘tkazib, 10 ta gol va 2 ta golli uzatmaga mualliflik qilgan. Futbolchining amaldagi klubi bilan amaldagi mehnat shartnomasi 2025-yilning yoziga qadar amal qiladi. Transfermarkt internet portalida berilgan ma’lumotlarga ko‘ra, 39 yoshli futbolchining bozor qiymati 15 million yevroni tashkil qiladi.
Izoh (0)