Filippinning Bakolod shahrida avtomobilning diniy marosim o‘tkazayotgan odamlarga borib urilishi oqibatida ikki kishi halok bo‘ldi, to‘qqiz kishi jarohatlandi.
Sinhua axborot agentligi xabar berishicha, hodisa 18-aprel kuni mahalliy vaqt bilan soat 19:30 atrofida, Xayrli jumaga bag‘ishlangan marosimdan odamlar qaytayotganda sodir bo‘lgan.
Politsiya ma’lumotlariga ko‘ra, bir kishi voqea joyida, yana biri kasalxonada vafot etgan.
Dastlabki ma’lumotlarga ko‘ra, haydovchi va besh nafar Hindiston fuqarosi bo‘lgan mashina uch g‘ildirakli velosiped va politsiya mashinasi bilan to‘qnashgan. Shundan keyin tadbirga yig‘ilgan boshqa dindorlarga borib urilgan.
Haydovchi qo‘lga olindi va u mast holatda mashina boshqarganlikda gumon qilinmoqda.
Avvalroq Hindistondagi diniy festivalda 40 dan oshiq kishi halok bo‘lgani xabar berilgandi.
400 million kishi qatnashgan marosimdagi tiqilinch oqibatida yana 60 kishi jarohatlangan. Festivalning asosiy marosimi — suvda cho‘milish bo‘lib, bu nafaqat tanani, balki ruhni ham gunohlardan poklaydi deb ishoniladi.
Ziyoratchilar Gang daryosiga kirishda navbatlarini kutib o‘tirgan, to‘satdan tartibsizlik va tirbandlik yuzaga kelgan. Olomon daryo qirg‘og‘iga qarab yo‘l olgan, odamlar yiqila boshlagan. Falokatga qaramay, festival davom etgan.
Izoh (0)