Yamandagi “Ansorulloh” harakati 14-iyul kuni Adan ko‘rfazida turgan Isroil kemalariga zarba bergan. Bu haqda Al Arabiya nashri xabar berdi.
Manbada aytilishicha, yakshanba kuni husiylar birdaniga ikki hududda amaliyotlar tashkil etgan. Hujumlarning dastlabkisi Adan portidan janubda, ikkinchisi esa Qizil dengiz shimolida o‘tkazilgan.
Husiylar matbuot kotibi Yahyo Sari hujum yuzasidan bayonot eʼlon qilgan. Unda aytilishicha, Adan ko‘rfazida Isroilning MSC UNIFIC kemasi nishonga olingan. Kemaga ballistik raketalar va dronlar bilan zarba berilgan.
Keyingi hujum Aqaba dengizi bo‘yidagi Isroilning Eylat portiga qaratilgan. Portda to‘xtab turgan Isroil kemalari uchuvchisiz qurilmalardan o‘qqa tutilgan.
Husiylarning so‘nggi amaliyotlari shanba kuni G‘azoning Xon Yunis shahriga Isroil uyushtirgan hujumga javoban amalga oshirilgan. O‘sha hujumda kamida 90 nafar falastinlik halok bo‘lib, 300 ga yaqin kishi jarohat olgan edi.
AQSH Markaziy qo‘mondonligi yakshanba kuni eʼlon qilgan bayonotida Qizil dengiz ustida husiylarning jami 4 ta harbiy droni urib tushirilganini maʼlum qilgan. Hududda harakatlanayotgan AQSH va Isroil kemalariga shikast yetmagani bildirilgan.
Maʼlumot o‘rnida, Yamanning “Ansorulloh” harakati o‘tgan yilning noyabr oyidan beri Qizil dengiz va Adan ko‘rfazida xalqaro yuk tankerlariga hujum uyushtirib kelmoqda. Guruhning aytishicha, bu harakatlar Isroilning G‘azodagi urushidan jabrlangan falastinliklar bilan birdamlikni ifoda etadi.
Husiylar hozirga qadar jami ikkita yirik kemani cho‘ktirib yuborgan. O‘nlab kemalar hibsga olingan. Hujumlarda uch nafar xorijlik dengizchi halok bo‘lgan.
Izoh (0)