АҚШнинг Ямандаги ҳусийларга уюштирган ҳаво ҳужумлари оқибатида 33 киши ҳалок бўлди, 80 киши жароҳатланди. Бу ҳақда The Guardian хабар берди.
Ҳужумлар Рас Иса нефть портига қаратилган бўлиб, мақсад ҳусийларнинг молиявий манбаларини йўқ қилиш бўлган. АҚШ Марказий қўмондонлиги ушбу даромадлар сўнгги 10 йилдан буён бутун минтақани даҳшатга солиш ҳаракатларини молиялаштириб келган.
Ушбу зарбалар Ямандаги оддий аҳолини нишонга олишга қаратилмаган. Улар ҳусийлар зулмидан қутулишни ва тинч ҳаёт кечиришни истайди, дейилади АҚШ қўмондонлиги баёнотида.
Ҳусийлар назоратидаги ал-Масираҳ сунъий йўлдош телеканали ҳужумдан кейинги ҳолат акс этган видеони намойиш этди. Кадрларда воқеа жойида жасадлар ётганини кўриш мумкин. Телеканалнинг таъкидлашича, портда ишлаётган фуқаролик ходимлари ва тез ёрдам ишчилари ҳам ҳалок бўлган. Ҳужум оқибатида кучли портлаш ва ёнғин юз берган.
9 апрель куни АҚШ давлат департаменти Яманга нефть етказиб бериш бўйича огоҳлантириш берган эди:
АҚШ ҳеч қандай давлат ёки тижорат ташкилотининг хорижий террористик гуруҳларга, жумладан, ҳусийларга, кемаларни тушириш ёки нефть билан таъминлаш орқали ёрдам беришига йўл қўймайди, дейилган эди.
Associated Press томонидан ўтказилган таҳлилга кўра, Трамп бошчилигидаги янги АҚСГ операцияси, собиқ президент Жо Байден давридагидан анча кенг қамровли. Эндиликда фақат ракета учириш жойлари эмас, балки юқори мартабали шахслар ва бутун шаҳарлар ҳам нишонга олинмоқда.
АҚШ ва Исроил уларнинг кемалари нишонга олинишига жавобан ҳусийларнинг ҳарбий объектлари ва тизимларига зарбалар бермоқда. Яман ҳусийлари Ғазо секторидаги уруш сабабли Исроилга алоқадор кемаларни нишонга олиб келмоқда.
2023 йил ноябридан 2024 йил январигача ҳусийлар 100 дан ортиқ савдо кемаларига ракета ва дронлар билан ҳужум қилган. Оқибатда икки кемани чўктирган ва тўрт денгизчи ҳалок бўлган. Ҳусийлар Америка ҳарбий кемаларига ҳам ҳужум қилган, аммо бу муваффақиятсиз кечган.
Трамп маъмурияти ҳусийларга қарши зарбаларни Эроннинг ривожланаётган ядровий дастурига босим ўтказиш воситаси сифатида ҳам кўриб чиқмоқда.
Изоҳ (0)