Qozog‘istonda sanoatda foydalanish uchun texnik kannabis yetishtirishni qonuniylashtirish rejalashtirilmoqda. Bu haqda mamlakat ichki ishlar vaziri o‘rinbosari Sanjar Adilovga tayanib Ulysmedia xabar berdi.
Yangilik faqat tarkibida yuqori miqdorda giyohvand moddalar bo‘lmagan texnik kannabisga taalluqli. U qonunchilik darajasida qat’iy tartibga solinadi.
Taklif etilayotgan o‘zgarishlarga ko‘ra, sanoat miqyosida yetishtirish uchun kanop (kannabis) tarkibidagi asosiy psixofaol komponent — tetragidrokannabinol (TGK) miqdori uchun chegara beldilanadi. Ko‘rib chiqilayotgan diapazon — 0,1 dan 0,3 foizgacha.
Adilovning ta’kidlashicha, bunday miqdor giyohvandlik ta’sirini keltirib chiqarmaydi, shu sababli noqonuniy muomala uchun qiziqish uyg‘otmaydi.
Gap faqat sanoatda qayta ishlashga mo‘ljallangan texnik kannabis haqida bormoqda. Hozirning o‘zidayoq qonunchilik TGKni nol miqdorda yetishtirishga ruxsat beradi. Narkobiznesga qarshi kurashish qo‘mitasi to‘rtta litsenziya bergan, ulardan biri Qo‘stanay viloyatida amalga oshirilmoqda. U yerda tarkibida TGK bo‘lmagan sanoat kannabisini yetishtirish va qayta ishlash bo‘yicha ishlar olib borilmoqda, dedi vazir o‘rinbosari.
Shuningdek, u ekish va kultivatsiyadan tortib qayta ishlash va tayyor mahsulotni ishlab chiqarishgacha bo‘lgan butun zanjir Narkotik jinoyatchilikka qarshi kurashish qo‘mitasi tomonidan qattiq nazorat ostida bo‘lishini aytdi.
O‘zbekistonda texnik kanop yetishtirishga ruxsat berilgan
Ma’lumot o‘rnida, O‘zbekistonda sanoatbop texnik kanop o‘simligini yetishtirishga ruxsat berilgan. Uning tarkibida tetragidrokannabinol giyohvandlik moddasining miqdori 0,2 foizgacha bo‘lishi kerak. 2022-yilda yetishtirilgan hosil 1,2 metr balandlikni tashkil etgan, 2023-yilda esa uzunligi 3,5 metrga yetgan.
Texnik kanop o‘simligining o‘ziga xos xususiyatlaridan biri uning 100 foiz qayta ishlanishida bo‘lib, bir qator xorijiy davlatlarda, xususan, Fransiya, Ispaniya, Italiya, Ukraina va Rossiyada ushbu o‘simlikning ko‘plab navlari (shu jumladan, O‘zbekistonda ekilayotgan “Rodnik” navi ham) yaratilgan va Davlat seleksiya yutuqlari reyestriga kiritilgan hamda ularni qishloq xo‘jaligi ekinlari sifatida ekib yetishtirishga ruxsat berilgan.
Izoh (0)