Singapurda kannabis savdosi bilan shug‘ullangan erkak qatl qilindi, deb xabar bermoqda DW nashri.
Transformative Justice Collective tashkiloti faoli Kirsten Xan qatl amalga oshirilganini va marhumning oilasi o‘lim guvohnomasini olganini tasdiqladi.
“46 yoshli singapurlik Tangaraju Suppia bugun Changi qamoqxonasida qatl etildi”, — deyiladi 25-aprel kuni berilgan xabarda
Tangaraju Suppia 2017-yilda 1017,9 gramm kannabisning “noqonuniy savdosiga ko‘maklashish”da aybdor deb topilgan, bu miqdor o‘lim jazosi qo‘llanilishi kerak bo‘lgan minimal darajadan ikki baravar ko‘p. 2018-yilda u o‘limga hukm qilingan, Apellyatsiya sudi bu qarorni o‘z kuchida qoldirgan.
Ma’lumot o‘rnida Singapurda giyohvandlikka doir dunyodagi eng og‘ir qonunlar mavjud. Qonunda aytilishicha, o‘lim jazosi noqonuniy narkosavdoga qarshi samarali to‘xtatuvchi vosita bo‘lib qolmoqda.
Biroq Birlashgan Millatlar Tashkilotining Inson huquqlari bo‘yicha Oliy komissari boshqarmasi bunga qo‘shilmaydi.
“O‘lim jazosi kam sonli mamlakatlarda hamon qo‘llanilmoqda. Bu jinoyat sodir etilishidan eng ko‘p saqlaydi, degan afsona mavjud. Biz tegishli jarayon va adolatli sud kafolatlari haqida xavotirdamiz. BMTning Inson huquqlari bo‘yicha idorasi rasmiylarni bu jazoning ijrosigacha bormaslikka chaqiradi”, — deydi muassasa bayonotida.
BMTning inson huquqlari bo‘yicha brifingida matbuot kotibi Ravina Shamdasani Singapur hukumatini giyohvand moddalar bilan bog‘liq jinoyatlar uchun qatllarga “rasmiy moratoriy” joriy etishga chaqirdi.
Avvalroq, Jenevada joylashgan Giyohvandlik siyosati bo‘yicha global komissiya a’zosi britaniyalik milliarder Richard Brenson ham Singapurni Tangarajuning qatl etilishini to‘xtatishga chaqirgan edi.
Bunga javoban Singapur Ichki ishlar vazirligi Tangarajuning aybi hech bir shubhasiz isbotlanganini ma'lum qildi.
“Branson bu bayonotlari bilan Singapur sudyalari va bizning jinoiy adliya tizimimizga hurmatsizlik ko‘rsatdi”, — deya qo‘shimcha qilgan vazirlik.
Izoh (0)