Respublika bojxonachilari giyohvandlik vositalarining bojxona chegaralari orqali noqonuniy ravishda olib o‘tilishi va ichki hududdagi aylanmasiga chek qo‘yishga qaratilgan chora-tadbirlarni muntazam davom ettirmoqda.
Amaldagi qonunchilikka binoan bojxona nazoratini chetlab yoki bojxona nazoratidan yashirib giyohvandlik vositalarini O‘zbekiston Respublikasining bojxona chegarasidan o‘tkazish kontrabanda hisoblanadi.
Davlat bojxona qo‘mitasi Axborot xizmati yaqin kunlarda hududlarda aniqlangan giyohvandlik vositalari bilan bog‘liq holatlarning ayrimlariga to‘xtalib o‘tadi.
Namangan
Namangan viloyati bojxona boshqarmasi tezkor tuzilmalari tomonidan Davlat xavfsizlik xizmati bilan hamkorlikda Yangiqo‘rg‘on tumanida o‘tkazilgan tezkor tadbir davomida avvaldan kuzatuvga olingan shaxs ketayotgan Cobalt avtomashinasi to‘xtatilib, xolislar ishtirokida ko‘zdan kechirildi.
Natijada avtomashina salonidagi oldingi yo‘lovchi o‘rindig‘i ostida mato o‘rami borligi aniqlandi. Ushbu o‘ram ochib ko‘rilganida esa uning ichida ekspertiza xulosasiga ko‘ra, 968,23 gramm bo‘lgan gashish giyohvandlik moddasi bor ekan. Shubhalar tasdig‘ini topib, ushbu giyohvandlik vositasi kuzatuvga olingan shaxsga tegishli bo‘lib chiqdi.
Viloyat bojxonachilarining davlat xavfsizlik xizmati xodimlari bilan Pop tumanida o‘tkazgan tezkor tadbiri davomida esa oldindan kuzatuvga olingan Nexia-3 avtomashinasini boshqarib ketayotgan shaxs to‘xtatilib, xolislar ishtirokida shaxsiy ko‘rikdan o‘tkazildi.
Natijada uning cho‘ntagidagi 1 dona o‘ramda ekspertlar xulosasiga ko‘ra, 49,08 gramm og‘irlikda gashish borligi fosh bo‘ldi.
Bojxonachilar va DXX xodimlarining Namangan shahrida o‘tkazilgan tezkor tadbiri davomida avvaldan kuzatuvga olingan 2 nafar shaxslar 2 kilogramm 296,54 gramm gashishni shartli xaridorga sotayotgan vaqtida ashyoviy dalillar bilan qo‘lga olindi.
Sirdaryo
Navbatdagi holatlar Sirdaryo viloyati bojxona boshqarmasi tomonidan fosh qilingan.
“Xovosobod” chegara bojxona posti orqali kirib kelgan qo‘shni davlat fuqarosiga tegishli avtotransport vositasi belgilangan tartibda bojxona ko‘rigidan o‘tkazilganida, avtomashina lyukining orasiga 1 dona o‘ramda 0,6 gramm gashish yashirib qo‘yilganligi fosh bo‘ldi.
Sirdaryo chegara bojxona postida esa Nexia 2 rusumli yengil avtotransport vositasida kirib kelgan qo‘shni davlat fuqarosi mashinaning haydovchi eshigi ichiga, dori qutisida 2,77 gramm ko‘knori boshoqlari va somonini yashirib qo‘ygani aniqlandi.
Farg‘ona
Farg‘ona viloyati bojxona boshqarmasi tezkor tuzilmalari tomonidan “Farg‘ona” chegara bojxona posti xodimlari bilan hamkorlikda Farg‘ona shahrida o‘tkazilgan tezkor tadbirda fuqarolardan biri boshqaruvidagi Spark avtomashinasi xolislar ishtirokida ko‘zdan kechirildi.
Natijada avtomashinadagi yo‘lovchiga tegishli bo‘lgan paketda xorijda ishlab chiqarilgan, ammo sifatini va bojxona rasmiylashtiruvini tasdiqlovchi hujjatlari bo‘lmagan qiymati 112 million so‘mlik 1120 dona “Regapen 300 mg” nomli kuchli ta’sir qiluvchi dori vositalari borligi aniqlandi.
Farg‘ona viloyati bojxona boshqarmasi xodimlari DXX bilan hamkorlikda o‘tkazilgan tezkor tadbirda noqonuniy ravishda saqlanayotgan 24,85 gramm gashish giyohvandlik vositasini aniqlashdi.
Buxoro
Buxoro viloyati bojxona boshqarmasi tezkor tuzilmalarining Davlat xavfsizlik xizmati xodimlari bilan hamkorlikda Buxoro xalqaro aeroporti yonida o‘tkazgan tezkor tadbiri davomida fuqarolardan biri 9 dona gugurt qutisiga joylangan giyohvandlik vositalarini sotayotgan vaqtida ashyoviy dalillar bilan qo‘lga olindi.
Ekspertiza xulosasiga ko‘ra, gugurt qutilariga joylangan modda 42,42 gramm og‘irlikdagi marixuana giyohvandlik vositasi ekanligi ma’lum bo‘ldi.
Xorazm
Xorazm viloyati bojxona boshqarmasi tezkor tuzilmalari, DXX va Milliy gvardiya xodimlari tomonidan Urganch shahrida o‘tkazilgan tezkor tadbirda fuqarolardan biri 536,2 gramm opiyni 50 million so‘mga sotgan vaqtida ushlandi.
Bojxona xodimlari hamda huquqni muhofaza qiluvchi boshqa idoralar vakillari bilan hamkorlikda Xiva shahrida o‘tkazilgan tezkor tadbirda shubha ostiga olingan fuqarolardan birining xonadoni belgilangan tartibda ko‘zdan kechirildi.
Natijada, xonadon tomorqasida 3 tup kannabis giyohvandlik o‘simligi parvarishlanayotganligi fosh bo‘ldi. Shuningdek, hovlidagi yordamchi bino ichida 2 dona 1 litrlik bankalarga 32,2 gramm marixuana joylab qo‘yilganligi ham aniqlandi.
Statistika
2022-yil 6 oyi davomida respublikamiz bojxonachilari tomonidan aniqlangan 189 ta huquqbuzarlik holatlarida 581 kilogramm giyohvandlik vositalarining bojxona chegaralari orqali noqonuniy olib o‘tilishi va ichki hududdagi aylanmasiga chek qo‘yilgan.
O‘tgan yilning shu davriga nisbatan solishtirilsa, ushlab qolingan giyohvandlik vositalari miqdori salkam 4,3 barobarga ko‘paygan. Ya’ni 2021-yilning dastlabki yarim yilligida bojxona xodimlari 240 ta holatda 136 kilogramm giyohvandlik vositalarini to‘xtatib qolishgan edi.
2022-yilning birinchi yarim yilligida ushlab qolingan narkotik moddalar 2021-yilda to‘liq yil davomida ushlab qolingan giyohvandlik vositalari hajmidan oshib ketdi. 2021-yilda bojxona xodimlari 432 ta huquqbuzarlik holatlarida jami 541 kilogramm giyohvandlik vositalarining noqonuniy realizatsiyasiga chek qo‘yishgan.
Izoh (0)