Yaponiya aholisi o‘tgan hisobot yilida (2023-yil oktyabrdan 2024-yil oktyabrgacha) 550 ming kishiga kamaydi. Bu haqda mamlakat Ichki ishlar va kommunikatsiyalar vazirligi ma’lumot berdi.
Ta’kidlanishicha, Yaponiya aholisi soni ketma-ket 14 yil davomida kamayib bormoqda. Hozirda mamlakatda 123,8 million kishi istiqomat qilmoqda. 15 yoshdan 64 yoshgacha bo‘lgan mehnatga layoqatli aholi soni 224 ming kishiga kamayib, 73,7 millionni tashkil etgan.
Mamlakatda yashovchi yapon fuqarolari soni 898 ming kishiga kamaygan. Bu statistika yuritila boshlangan, 1968-yildan buyon yillik pasayishning eng yuqori ko‘rsatkichi hisoblanadi.
Shu bilan birga Yaponiya aholisi sezilarli darajada qarib bormoqda. Yil yakunlariga ko‘ra, 15 yoshgacha bo‘lgan aholining umumiy aholi sonidagi ulushi 11,2 foizni tashkil etdi. Bu 13,83 million kishi bo‘lib, o‘tgan yilga nisbatan 343 ming kishiga kam va tarixdagi eng past ko‘rsatkichdir. Keksalar (65 yoshdan oshganlar) soni esa ko‘payishda davom etmoqda. 2024-yilda ularning soni 17 mingtaga oshib, 36,24 millionga yetdi. Ular Yaponiya aholisining 29,3 foizini tashkil etadi.
Aholining kamayishi mamlakatda soliq to‘lovchilar sonini ham kamaytirmoqda. Ayni paytda Yaponiyada ishsizlik darajasi 2,4 foizni tashkil etib, to‘rt yil davomida 3 foizdan past bo‘lib kelmoqda.
Recruit Works Institute ma’lumotlariga ko‘ra, 2040-yilga kelib Yaponiya 11 million ishchi kuchi taqchilligiga duch keladi. Hozirda aholi yetishmovchiligi qisman chet elliklar sonining ko‘payishi hisobiga qoplanmoqda.
Izoh (0)