Yaponiyaning eng yirik uyushgan jinoyatchilik guruhi – “Yamaguchi-gumi” politsiyaga murojaat qilib, raqib to‘da bilan ko‘p yillik urushni tugatishini va “boshqa muammo keltirmaslik” majburiyatini olganini ma’lum qildi. Bu haqda CNN xabar bermoqda.
Dushanba kuni “Yamaguchi-gumi”ning uch nafar yuqori martabali a’zosi Hyogo prefekturasi politsiya boshqarmasiga kelib, “ichki to‘qnashuvlarni tugatish va tinchlikni saqlash” mazmunidagi rasmiy xatni topshirgan.
“Yamaguchi-gumi” dunyodagi eng boy va eng katta jinoiy sindikatlardan biri bo‘lib, 2015-yildan beri o‘zidan ajralib chiqqan “Kobe Yamaguchi-gumi” bilan ochiq ziddiyatda edi. Bu ikki guruh o‘rtasidagi raqobat o‘nlab otishma va pichoqbozliklarga sabab bo‘lgan.
“To‘qnashuvlar jiddiy va oldindan aytib bo‘lmas holatga kelgan”, degan edi Yaponiya Milliy politsiya agentligi 2021-yilda.
Bu ikki jinoiy guruh o‘rtasidagi to‘qnashuvlar asosan jamoat joylarida ro‘y bergani sababli politsiya xavfsizlik choralarini kuchaytirishga majbur bo‘lgan.
Yakuza: qonuniy emas, lekin taqiqlanmagan ham
Yaponiyada “yakuza” atamasi uyushgan jinoyatchilik guruhlari uchun umumiy nom bo‘lib, ular to‘g‘ridan to‘g‘ri taqiqlanmagan, biroq rasmiy ravishda nazorat ostida va cheklovlar bilan faoliyat yuritadi. Qolaversa, ular o‘ziga xos an'analar va “yozilmagan qoidalar”ga ega.
2020-yildan boshlab “Yamaguchi-gumi” va “Kobe Yamaguchi-gumi” “urush holatidagi guruhlar” sifatida tan olingan. Bu politsiyaga:
- ularning faoliyatini cheklash,
- ofislaridan foydalanishni taqiqlash,
- moliyaviy oqimlarini nazorat qilish kabi vakolatlarni bergan.
Yakuza tanazzulda, yangi xavf — tokuryu
Rasmiy ma’lumotlarga ko‘ra, 2024-yilda yakuza a’zolari soni 18 800 nafarni tashkil etgan. Bu so‘nggi o‘n yilliklardagi eng past ko‘rsatkich hisoblanadi. Xususan, “Yamaguchi-gumi” a’zolari 2014-yildagi 6 000 nafardan, 2024-yil oxiriga kelib 3 300 nafarga qisqargan. “Kobe Yamaguchi-gumi”da esa atigi 120 nafar a’zo qolgan.
Yakuza tanazzulga uchrarkan, Yaponiya hukumati oldida yangi xavf paydo bo‘ldi. U tokuryu bo‘lib, hech bir mafiyaga aloqador bo‘lmagan, kichik va mustaqil jinoiy guruhlar hisoblanadi.
Birgina o‘tgan yilning o‘zida tokuryu guruhlariga aloqador 10 ming kishi tergovga tortilgan.
Izoh (0)