Keksa amerikalik sayyoh xalqaro aeroportlarda ikki marta tekshiruvdan o‘tishga muvaffaq bo‘lgan. U o‘zini himoya qilish to‘pponchasini adashib chamadonga solib qo‘ygan va uni faqat Yaponiyaning Osaka shahriga kelgach, mehmonxonada bilgan. Bu haqda NHK telekanali xabar berdi.

Telekanal ma’lumotlariga ko‘ra, Gavayidan Yaponiyaga kelgan 73 yoshli amerikalik Osaka yaqinidagi Kobe shahri portida kruiz kemasi yo‘lovchisi bo‘lishdan oldin ixtiyoriy ravishda politsiyaga taslim bo‘lgan. Tergov materiallariga ko‘ra, sayyoh politsiyaga 22-mart kuni Gavayi aeroportidan uchib, Kansai xalqaro aeroporti orqali Yaponiyaga yetib kelganini aytgan.
“Men bu to‘pponchani o‘zimni himoya qilish uchun olib yurardim va bexosdan uni chamadonga solib qo‘yibman. Buni faqat Osakadagi mehmonxonaga joylashganimdan so‘ng bildim” deya sayyohning so‘roq paytidagi so‘zlarini keltiradi telekanal.
Shuningdek, amerikalik to‘pponcha bilan birga o‘qlarning bo‘lishi aybini yanada og‘irlashtiradi deb o‘ylab, o‘qlarni Kobe portiga tashlab yuborganini aytgan. Uning yuklari tekshirilganda, chamadonidan haqiqatan ham to‘pponcha topilgan, port terminalidagi hojatxonaning axlat qutisidan esa sayyoh aytgan uchta o‘q chiqqan.
Ta’kidlanishicha, erkak o‘qotar qurollarni nazorat qilish to‘g‘risidagi qonunni buzganlikda gumon qilinib, qamoqqa olingan. Politsiya uning chamadonidagi to‘pponcha bilan Gavayi va Kansay xalqaro aeroportlaridagi xavfsizlik tekshiruvlaridan qanday o‘ta olganini aniqlashga harakat qilmoqda.
Izoh (0)